រាជធានីភ្នំពេញ ៖ បន្ទាប់ពីបែកធ្លាយវីដេអូសមត្ថកិច្ចចរាចរណ៍ជើងគោកម្នាក់ បានយកប្រាក់ដោយមិនបានចេញបង្កាន់ដៃត្រឹមត្រូវ ត្រូវគណនីមួយបង្ហោះពេញបណ្តាញសង្គមហ្វេសប៊ុក រហូតធ្វើឲ្យមហាជនរិះគន់គ្រប់គ្នានោះ នៅព្រឹកថ្ងៃទី១១ ខែមិថុនា ឆ្នាំ២០១៩ នេះ លោកឧត្តមសេនីយ៍ផ្កាយ៣ ស ថេត ស្នងការនគរបាលរាជធានីភ្នំពេញ បានសម្រេចផ្អាកការងារមន្ត្រីប៉ូលិសរូបនោះ ជាបណ្តោះអាសន្នហើយ ។
មន្ត្រីប៉ូលិសដែលត្រូវថ្នាក់លើផ្អាកការងារបណ្តោះអាសន្ននេះ មានឈ្មោះ ស៊ីម ប៊ុនធឿន អត្តលេខ៦៥៤៣៣ ឋានៈនាយរងផ្នែកការពារ និងអន្តរាគមន៍ ចំណុះអធិការដ្ឋានខណ្ឌមានជ័យ ។
នៅក្នុងលិខិតរបស់លោកឧត្តមសេនីយ៍ ក៏បានបញ្ជាក់ផងដែរថា មន្ដ្រីនគរបាលរូបនេះ ត្រូវមកបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី ។ យោងតាមលិខិតបង្គាប់ការ បានសម្រេច ដូចខាងក្រោម ៖
ប្រការ១ ៖ ត្រូវបានផ្អាកការងារបណ្តោះអាសន្នចំពោះលោកឧត្តមសេនីយ៍ឯក ស៊ីម ប៊ុនធឿន ឋានៈនាយរងផ្នែកការពារ និងអន្តរាគមន៍ ចំណុះអធិការដ្ឋានខណ្ឌមានជ័យ នៃស្នងការដ្ឋាននគរបាលរាជធានីភ្នំពេញ ដោយមូលហេតុ “ផាកពិន័យមិនត្រឹមត្រូវមិនចេញបង្កាន់ដៃតាមការកំណត់” ។
ប្រការ២ ៖ សាមីខ្លួនត្រូវមកបង្ហាញខ្លួននៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចចិត្តជាថ្មី ។
ប្រការ៣ ៖ លោកស្នងការរងទទួលផែនការសេនាធិការ លោកស្នងការរងទទួលផែនការធនធានមនុស្ស លោកនាយការិយាល័យបុគ្គលិក លោកអធិការដ្ឋាននគរបាលខណ្ឌមានជ័យ និងលោកអនុសេនីយ៍ឯក ស៊ីម ប៊ុនធឿន ត្រូវអនុវត្តលិខិតបង្គាប់ការនេះ ចាប់ពីថ្ងៃចុះហត្ថលេខានេះ ។
សូមរម្លឹកថា កាលពីថ្ងៃទី១០ ខែមិថុនា ឆ្នាំ២០១៩នេះ បានយោងតាមហ្វេសប៊ុកមួយដែលមានឈ្មោះ Stoner Meme បានសរសេរសារបង្ហោះនៅក្នុងសង្គមហ្វេសប៊ុកជាមួយនឹងវីដេអូមួយផងដែរ ដោយបញ្ជាក់អំពីសកម្មភាពផាកពិន័យរបស់មន្ត្រីប៉ូលីសចរាចរណ៍ ។
ក្នុងនោះម្ចាស់គណនីខាងលើបានសរសេរថា «តើគួរទុកទៀតទេ ប៉ូលីសដាក់ប៉ារាស់ផាកមិនចេញវិក្កយបត្រ យកលុយឆៅឆៅ រាល់ថ្ងៃ ? ហើយនិយាយសុទ្ធតែគ្មានលុយមិនបាច់និយាយជាមួយពួកគាត់ទេ
នេះហើយប៉ូលីសស្រុកខ្មែរ គ្នាអ្នកខ្លះអត់លុយ សុំចុះថ្លៃតិចតួចក៏អត់បានដែរ ដាច់ខាត អត់មួក ១៥,០០០រៀល អត់កញ្ចក់ ២៥,០០០រៀល បើដាក់ កញ្ចក់ខុស ១០ម៉ឺន មិនបាច់តវា តវាច្រើនលើកឡើងឡាន ហើយគំរាមអត់សរសេរវិក្កយបត្រអោយទៀត ប៉ូលិសថា បើអត់មានអានឹងអ្ហែងយកម៉ូតូអត់បាន
តើគួរមានវិធានការអ្វីអត់ បើថតបានស្រស់ៗប៉ុណ្នឹងហើយ ? បើទុកអញ្ចឹងតទៀតអស់ជំនឿលើច្បាប់ហើយ
(ដាក់ប៉ារាស់ចាប់មុខវត្តមុន្នីជិតផ្សាស្ទឹងមានជ័យថ្មីរាល់ថ្ងៃ) ស៊ែរមួយ ដើម្បីលុបបំអំពើពុករលួយ» ។
ដោយឡែកក៏ប្រជាពលរដ្ឋខ្លះទៀតដែលធ្វើដំណើរតាមដងផ្លូវដែលធ្លាប់ត្រូវបានលោកប៉ូលិសផាកពិន័យមិនចេញវិក្កយបត្រដូចគ្នានឹងដែរ ក៏ប្រាប់អោយដឹងថា មិនមែនមានតែប៉ូលិសខណ្ឌមានជ័យមួយរូបនឹងទេ ខណ្ឌផ្សេងទៀតក៏មានករណីដូច្នឹងដែរ ៕
