ខេត្តត្បូងឃ្មុំ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងថា អ្នកដែលជិះឡាន ហើយមិនពាក់ខ្សែក្រវ៉ាត់សុវត្ថិភាព ភាគច្រើន គឺជាអ្នកធំ ។
សម្តេចក្រឡាហោម ស ខេង ថ្លែងបែបនេះ នាព្រឹកថ្ងៃទី១១ ខែមិថុនា ឆ្នាំ២០១៩នេះ នៅក្នុងកម្មវិធីប្រារព្ធ ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១២ ដែលធ្វើឡើងនៅ ភូមិពោធិ៍ស្រុក ឃុំកោងកាង ស្រុកពញាក្រែក ខេត្តត្បូងឃ្មុំ ។ ពិធីនេះមានអ្នកចូលរួមជាង៤,០០០នាក់ ។
សម្តេចលើកយកករណីអភិបាលខេត្តក្រចេះ លោក ខាំ ភឿន និងអភិបាលខេត្តបន្ទាយមានជ័យ លោក ទ្រី ណារិន ដែលបានធ្វើដំណើរតាមរថយន្តហើយជួបគ្រោះថ្នាក់ចរាចរណ៍ រហូតដល់បាត់បង់ជីវិត ដោយសារមិនពាក់ខ្សែក្រវ៉ាត់សុវត្ថិភាព ។
សម្តេចក្រឡាហោម ស ខេង បញ្ជាក់ថា ខ្សែក្រវ៉ាត់សុវត្ថិភាព គឺជួយបាន៨០% នៅពេលជួបគ្រោះថ្នាក់ចរាចរណ៍ ដូច្នេះនៅពេលជិះរថយន្តទាំងអ្នកបើកបរ ទាំងអ្នកជិះជាមួយ(ជិះខាងក្រោយ) ត្រូវពាក់ខ្សែក្រវ៉ាត់សុវត្ថិភាពទាំងអស់គ្នា ។
ទិវាសប្តាហ៍ជាតិសុវត្ថិភាពចរាចរណ៍ផ្លូវគោក ត្រូវបានបង្កើតឡើង ដើម្បីពញ្ញាក់ស្មារតីអ្នកប្រើ ប្រាស់ផ្លូវឲ្យយកចិត្តទុកដាក់ លើការគោរពច្បាប់ចរាចរណ៍ផ្លូវគោក សំដៅចូលរួមកាត់បន្ថយគ្រោះថ្នាក់ចរាចរណ៍ ឲ្យនៅកំរិតទាប និងអប់រំផ្សព្វផ្សាយស្តីពីហានិភ័យ បណ្តាលមកពីបើកបរហួសល្បឿនកំណត់, ស្រវឹងបើកបរ, ការមិនពាក់មួកសុវត្ថិភាព និងមិនពាក់ខ្សែក្រវាត់ជាដើម និងក្នុងគោលបំណង ឈានទៅរួមគ្នាលុបបំបាត់ភាពអនាធិបតេយ្យ នៃការធ្វើចរាចរណ៍តាមដងផ្លូវសាធារណៈ និងជំរុញការអនុវត្តច្បាប់ ឲ្យទទួលបានលទ្ធផលជាវិជ្ជមាន ៕
