ភ្នំពេញ ៖ នៅរសៀលថ្ងៃទី១០ ខែមិថុនា ឆ្នាំ២០១៩ នេះលោកស្រី កែវ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចជាផ្លូវការហើយ លើស្ត្រីខ្មានកាំភ្លើង មានឈ្មោះ ផាន ស្រីលីន អាយុ២៩ឆ្នាំ ដោយចោទប្រកាន់ពីបទប៉ុនប៉ងឃាតកម្ម និងប្រើប្រាស់អាវុធដោយខុសច្បាប់ ។
ក្រោយចោទប្រកាន់ពីបទប៉ុនប៉ងឃាតកម្ម និងប្រើប្រាស់អាវុធដោយខុសច្បាប់ សំណុំរឿងនេះ នឹងត្រូវបន្តបញ្ជូនទៅចៅក្រមស៊ើបសួរ ដើម្បីសម្រេចលើវាសនាជនត្រូវចោទរូបនេះថា តើត្រូវឃុំខ្លួនរឺយ៉ាងណា ?
ម្សិលមិញនេះ សមត្ថកិច្ចនគបាលព្រហ្មទណ្ឌខណ្ឌដូនពេញ បានបញ្ជូនខ្លួនស្ត្រីឈ្មោះ ផាន ស្រីលីន អាយុ២៩ឆ្នាំ រួមទាំងវត្ថុតាងអាវុធខ្លី ទៅតុលាការដើម្បីប្រគល់ជូនតំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ និងចោទប្រកាន់តាមផ្លូវច្បាប់ ពាក់ពន្ធ័ករណីបាញ់ចំនួន២គ្រាប់ នៅក្នុងវត្តសារ៉ាវ័ន្ត ស្ថិតក្នុងកុដិលេខ២៣ ។
សូមជម្រាបថា ហេតុការណ៍ផ្ទុះអាវុធនេះ បានកើតឡើងនៅវេលាម៉ោង៦និង១៥នាទីយប់ ថ្ងៃទី០៧ ខែមិថុនា ឆ្នាំ២០១៩ ស្ថិតនៅក្នុងវត្តសារ៉ាវ័ន្ត ក្នុងកុដលេខ២៣ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។បន្ទាប់មកសមត្ថកិច្ចធ្វើការឃាត់ខ្លួនស្ត្រីម្នាក់ដែលដកកាំភ្លើងបាញ់២គ្រាប់ក្នុងវត្តសារ៉ាវន្ត័ ហើយដើមចម បណ្តាលឲ្យស្ត្រីដកកាំភ្លើងបាញ់មេឃ គឺដោយសារតែខឹងនិងព្រះសង្ឃមួយអង្គព្រះនាម ស៊ូ ពិសិដ្ឋ អាយុ៣២វស្សា ជាសង្ឃគង់នៅវត្តសារ៉ាវ័ន្ត កុដ្ឋលេខ២៣ ដោយនាងចោទថាដាក់អំពើឲ្យប្តីឲ្យធ្លាក់ខ្លួនឈឺ ។
សមត្ថកិច្ចបានឲ្យដឹងថា ស្ត្រីឈ្មោះ ផាន ស្រីលីន មានស្រុកកំណើតនៅខេត្តកណ្ដាល និងមានប្ដីជាជនជាតិ បរទេសធ្វើការនៅប្រទេសថៃ ។
សមត្ថកិច្ចបានបន្ដទៀតថា ដើមចងដែលធ្វើឲ្យ ស្ត្រីខាងលើដកកាំភ្លើងបាញ់មេឃក្នុងវត្ដសារ៉ាវន្ត័ គឺ កាល២ឆ្នាំមុនស្ដ្រីខាងលើរួមជាមួយ នឹងស្វាម៉ី បានទៅរកលោក(ព្រះសង្ឃ) ដើម្បីសូត្រមន្តលើករាសី ប៉ុន្តែមួយរយៈក្រោយមកប្ដីរបស់ស្ដ្រីខាងលើ បានត្រឡប់ទៅធ្វើការនៅប្រទេសថៃវិញ ហេីយក៏ធ្លាក់ខ្លួនឈឺ ទើបនៅថ្ងៃកើតហេតុ ស្ត្រីខាងលើមិនដឹងថា ទៅរកគ្រូទាយឯណាទេ ? ដឹងថា ប្តីរបស់ខ្លួនត្រូវអំពើលោក(ព្រះសង្ឃ)មួយអង្គ ទើបបើករថយន្តចូលទៅបាញ់មេឃចំនួន២ គ្រាប់ ដើម្បីគំរាមលោក (ព្រះសង្ឃ) មួយអង្គតែម្តង ៕