រាជធានីភ្នំពេញ ៖ មន្ត្រីក្រសួងបរិស្ថានម្នាក់ បានសម្លាប់ខ្លួន ដោយលោតពីលើអគារជាន់ទី៤ (អគារក្រសួងបរិស្ថាន) ស្លាប់យ៉ាងអាណោចអាធ័ម បង្កឱ្យមានការភ្ញាក់ផ្អើលឡើង នាម៉ោង១០ព្រឹកថ្ងៃទី១០ មិថុនា ស្ថិតក្នុងសង្កាត់ទន្លេបាសាក់ ខណ្ឌចំការមន ។
បើតាមការបញ្ជាក់របស់លោក នេត្រ ភក្ត្រា រដ្ឋលេខាធិការនិងជាមន្ត្រីនាំពាក្យនៃក្រសួងបរិស្ថាន បានអោយដឹងថា ជនរងគ្រោះមានឈ្មោះ អោម សេងហួរ អាយុ៣១ឆ្នាំ មានតួនាទីជានាយកដ្ឋានវាយតម្លៃហេតុផលប៉ះពាល់បរិស្ថាន នៃក្រសួងបរិស្ថាន ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ ជនរងគ្រោះខាងលើមកធ្វើការងារធម្មតា គឺមិនមាននរណាម្នាក់ចាប់អារម្មណ៍ថាគាត់មានរឿងអ្វីនោះទេ។ លុះដល់វេលាម៉ោងកើតហេតុ ជនរងគ្រោះក៏បានលោតពីលើអគារក្រសួងបរិស្ថាន ជាន់ទី៤ បណ្តាល់ឲ្យស្លាប់បាត់បង់ជីវិត គួរឲ្យរន្ធត់។ ភ្លាមៗនោះ ក៏មានមន្ត្រីបម្រើការងារផ្សេងទៀត បាននាំផ្អើលឈូឆរនាំគ្នាមកមើលជនរងគ្រោះ ។
ក្រុមមន្ត្រីនគរបាលជំនាញ ដោយសហការជាមួយមន្ត្រីក្រសួងបរិស្ថាន បានធ្វើកោសល្យវិច័យលើសាកសព និងបញ្ជាក់ថាលោក អោម សេងហួរ ពិតជាបានធ្វើអត្តឃាតដោយលោត ពីលើអគារទីស្តីការក្រសួងបរិស្ថានមែន ។ បើតាមប្រភពស្និទ្ធិលោក អោម សេងហួរ ប្រាប់ថា ជនរងគ្រោះមានវិបត្តិផ្ទាល់ខ្លួន ពោលគឺលោកមានជំងឺប្រចាំកាយ ដែលខិតខំព្យាបាលជាច្រើនឆ្នាំហយតែមិនជាសះស្បើយ ។
ពាក់ព័ន្ធនឹងការលោតសម្លាប់ខ្លួនរបស់មន្ត្រីរូបនេះ ក្រោយពីធ្វើកោសល្យវិច័យលើសាកសពជនរងគ្រោះរួចមក សពត្រូវបានគេបញ្ជូនចេញពីបរិវេណក្រសួងបរិស្ថាន ដែលជាកន្លែងកើតហេតុតាមរយៈរថយន្តសាម៊ុយ ៕
