រាជធានីភ្នំពេញ ៖ លោកឧត្តមសេនីយ៍ឯក ឡឹក វណ្ណៈ ប្រធានមន្ទីរប្រឆាំងគ្រឿងញៀន បានចេញមកប្រកាសទាត់ចោលការចោទប្រកាន់ទាំងឡាយណាថា មន្ទីរបានដោះលែងមុខសញ្ញា ជាថ្នូរនឹងទឹកប្រាក់ខ្ទង់ពាន់ដុល្លារ ។
លោកបានមានប្រសាសន៍បែបនេះនៅរសៀលថ្ងៃទី២៨ ឧសភា ២០១៩ ដោយលោកប្រាប់ថា ការចោទប្រកាន់ថា មន្ទីរដោះលែងជនល្មើស ជាថ្នូរនឹងលុយខ្ទង់ពាន់ដុល្លារ ទំនងជាទទួលបានព័ត៌មានខុសពីការពិត ។ លោកបន្តថា មានជនឆបោកខ្លះ បានដើរតួនិងរត់ការដោះលែងអ្នកពាក់ព័ន្ធគ្រឿងញៀន ដោយយកឈ្មោះថ្នាក់ដឹកនាំមន្ទីរទៅភូតកុហកក្រុមគ្រួសាររបស់ជនល្មើសទៅវិញទេ ។
ការចេញមកបដិសេធនេះ បន្ទាប់ពីមានព័ត៌មានត្រូវបានចែកចាយបន្តបន្ទាប់តាមបណ្តាញសង្គមហ្វេសប៊ុកថា«ស្ត្រីម្នាក់អះអាងថា ប្តីរបស់គាត់ ត្រូវបានកម្លាំងនគរបាលមន្ទីរគ្រឿងញៀនចាប់ខ្លួនកាលពីថ្ងៃទី២០ ខែឧសភា ឆ្នាំ២០១៩ នៅម្តុំវត្តនាគវ័ន្ត ក្នុងរាជធានី ភ្នំពេញ ។ ប្តីរបស់គាត់ មិនបានប្រើប្រាស់ ឬក៏ជួញដូរគ្រឿងញៀន ដូចប៉ូលិសចោទប្រកាន់ នោះទេ ។ ប៉ូលិសចាប់ខ្លួនប្តីរបស់គាត់ គឺបាននាំយកទៅមន្ទីរប្រឆាំងគ្រឿងញៀន នៅក្នុងអគ្គស្នងការនគរបាលជាតិ ជិតស្ពានអាកាសក្បាលថ្នល់ ដោយប៉ូលិស បានធ្វើរបាយការណ៍ថា ប្តីរបស់គាត់ជាអ្នកជួញដូរគ្រឿងញៀន ហើយបើចង់សម្របសម្រួល ដោះលែងវិញត្រូវបង់លុយ ឲ្យប៉ូលិសចំនួន២០០០ដុល្លារ (២ពាន់ដុល្លារ) ។ ក្រោយមកដោយគាត់ និងក្រុមគ្រួសារ សុំអង្វរ ប៉ូលិសនោះ ទើបខាងមន្ទីរគ្រឿងញៀន ចុះថ្លៃសល់ត្រឹម១០០០ដុល្លារ(១ពាន់ដុល្លារ) ។
ករណីនេះ លោកផ្កាយបី ឡឹក វណ្ណៈ បញ្ជាក់យ៉ាងដូច្នេះថា «អាទិត្យមុននេះ ខ្ញុំចាប់បុរសម្នាក់ និងបញ្ជូនទៅតុលាការ ដោយបុរសម្នាក់នេះមានឈ្មោះ វី ផានិត អាយុ៣៤ឆ្នាំ ប្រើល្បិចធ្វើជាអ្នកស្គាល់នាយរង និងការិយាល័យ ហើយដើរមកក្បែរបន្ទប់ រួចចេញទៅប្រាប់ក្រុមគ្រួសារអ្នកពាក់ព័ន្ធគ្រឿងញៀនវិញថា រូបគេមានលទ្ធភាពជួយបាន ពេលនោះក្រុមគួសារក៏ឲ្យលុយទៅ រូបគេក៏ស៊ីដាច់បាត់» ។ ព្រោះមានករណីខ្លះ ពួកជនខិលខូច ចាំលួចស្តាប់ខ្យល់ ពេលដឹងថា សមត្ថកិច្ចអនុញ្ញាតិឲ្យអាណាព្យាបាល ធានាជនញៀនថ្នាំ យកទៅអប់រំ ព្យាបាលក្នុងសហគមន៍ ជនឆបោកទាំងនោះ ក៏ឆ្លៀតមកប្រាប់ក្រុមសារថា ប៉ូលីសយកលុយប៉ុណ្ណេះ យកលុយប៉ុណ្ណោះទៅ ។
លោកផ្កាយបី ឡឹក វណ្ណៈ បន្ថែមថា មិនមែនលោកចង់បដិសេធការរិៈគន់ ដើម្បីស្ថាបនារបស់អ្នកសារព័ត៌មានទេ ប៉ុន្តែពេលខ្លះ អ្នកយកព័ត៌មានមិនបានស៊ីជម្រៅ ក៏ចុះផ្សាយទៅ ហើយក៏មានការប៉ះពាល់ដល់ស្ថាប័ន ដូច្នេះ សុំឲ្យអ្នកសារព័ត៌មានដាក់ឲ្យចំឈ្មោះបុគ្គលអ្នកប្រព្រឹត្តនោះទៅ ដើម្បីយើងមានវិធានការតាមវិន័យប៉ូលីស និងច្បាប់ជាតិ ។
ទាក់ទិនទៅនឹងករណីខាងលើនេះ លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកគ្រឿងញៀន បានប្រាប់អ្នកសារព័ត៌មានក្នុងស្រុក នៅព្រឹកថ្ងៃទី២៨ ឧសភា ២០១៩ នេះថា «លោក មិនបានដឹងរឿងនេះទេ ប៉ុន្តែលោកនឹងស្រាវជ្រាវ និងចាត់វិធានការលើរឿងនេះ» ។
នាយឧត្តមសេនីយ៍ ម៉ក់ ជីតូ បញ្ជាក់ថា មានមន្ត្រីខ្លះខូចដែរ ដើរយកលុយយកកាក់ពីប្រជាពលរដ្ឋ ដើម្បីដោះលែង កូនចៅសាច់ញាតិ ។ លោកក៏បានស្នើឱ្យសាច់ញាតិ ដែលមានកូនចៅ ឬបងប្អូន ដែលនគរបាលចាប់ខ្លួនហើយ ទារលុយជាថ្នូរនឹងការដោះលែងពាក់ព័ន្ធគ្រឿងញៀននោះ សូមទាក់ទងមក លោក ដើម្បីលោកហៅមន្ត្រីប៉ូលិសនោះមកសាកសួរ និងចាត់វិធានការតាមច្បាប់ ។ ទោះជាយ៉ាងណា កន្លងមក ក៏មានករណីប្រជាពលរដ្ឋប្តឹងកម្លាំងនគរបាល ដែលយកលុយពីជនសង្ស័យ ឬក្រុមគ្រួសារ ក្នុងរឿងគ្រឿងញៀន ទាំងនេះដែរ ហើយត្រូវលោកក៏បានហៅមន្ត្រីប៉ូលិសទាំងនោះ មកបញ្ឈរជើងផងដែរ ៕