ភ្នំពេញ ៖ រយៈពេលប្រមាណជា៣ថ្ងៃកន្លងទៅនេះ នៅលើបណ្តាញសង្គមហ្វេសប៊ុក មានម្ចាស់គណនីហ្វេសប៊ុកឈ្មោះ Van Soroth បានបង្ហាញនូវរឿងរ៉ាវ ដែលសាច់ញាតិរបស់ខ្លួនមានជម្ងឺធ្ងន់ធ្ងរ ហើយសម្រាកព្យាបាលនៅមន្ទីរពេទ្យមិត្តភាពខ្មែរសូវៀត ប៉ុន្តែខាងក្រុមគ្រូពេទ្យនៅខ្មែរ រកមិនឃើញថា មានជម្ងឺអ្វីនោះទេ ។
គណនីហ្វេសប៊ុកដដែលនេះ អោយដឹងថា ទាំងដែលបងប្រុសរបស់លោក មានបញ្ហានោម រហូតដល់ធ្លាក់ឈាម ដោយសម្រាកព្យាបាលមិនឃើញមានអ្វីប្រសើរឡើង ហើយអ្នកជម្ងឺកាន់តែធ្ងន់ ក្រុមគ្រួសារក៏សម្រេចបញ្ជូនទៅមន្ទីរពេទ្យនៅឯប្រទេសវៀតណាម ។ នៅពេលទៅដល់វៀតណាម គេរកឃើញបញ្ហារលាកតំរងនោមធ្ងន់ធ្ងរ ហូរឈាមច្រើនពេកធ្វើអោយសរសៃឈាមស្ងួត និងស្វិត ។
លោក Van Soroth បានសរសេរយ៉ាងដូច្នេះថា «ប៉ះសាច់ខ្លួនឯងទើបដឹងថា ឈឺចាប់យ៉ាងណាថា មន្ទីរពេទ្យមិត្តភាពខ្មែរសូវៀត (ហៅមន្ទីរពេទ្យរុស្សី) យ៉ាងមិច បើសិនជាក្រុមគ្រួសាររបស់ខ្ញុំមានការយឺតយ៉ាវក្នុងការបញ្ចូនបងប្រុសរបស់ខ្ញុំទៅសង្គ្រោះបន្ទាន់នៅប្រទេសវៀតណាមច្បាស់ជាម៉ោងនេះ ខ្ញុំកំពុងធ្វើបុណ្យសពអោយបងប្រុសរបស់ខ្ញុំហើយ» ។
ក្រោយពីមានការបង្ហោះនូវករណីនេះ មានមហាជនជាច្រើនសម្តែងខកចិត្តជាខ្លាំង ចំពោះបញ្ហានេះ ជាពិសេសបងប្អូនប្រជាពលរដ្ឋខ្មែរមួយចំនួនបានបាត់ទំនុកចិត្តលើវិស័យសុខាភិបាលកម្ពុជា ។ ក្នុងនោះក៏មានការសំណូមពរពីមហាជនឲ្យមានការបកស្រាយពីសំណាក់ក្រុមគ្រូពេទ្យនៅមន្ទីរពេទ្យរុស្ស៊ីផងដែរ ។
ស្រាប់តែនៅរសៀលម៉ោង៣និង៣៨នាទីថ្ងៃទី២៣ ឧសភានេះ លោក Van Soroth បានអោយដឹងបន្ថែមថា «អ្វីដែលខ្ញុំផុស គឺជាភាពឈឺចាប់របស់ខ្ញុំផ្ទាល់ និងក្រុមគ្រួសាររបស់ខ្ញុំ ដែលមិនអាចទទួលយកបានចំពោះគ្រូពេទ្យមួយចំនួន តែមិនទាំងអស់ទេ នៅមន្ទីពេទ្យរុស្ស៊ី ដែលមិនបានបម្រើប្រជាពលដោយឆន្ទៈ និងវិជ្ជាជីវៈ ដែលខ្លួនមាន ។ ឥឡូវនេះ មានមនុស្សមួយចំនួនកំពុងតែលាបពណ៍ខ្ញុំជាមនុស្សពួកប្រឆាំង (សង្គ្រោះជាតិ) រាយការណ៍ទៅថ្នាក់ដឹកនាំ ។ រឿងអាយុជីវិតកើតលើគ្រួសារអ្នក សាច់ញាតិអ្នកទើបអ្នកឈឺចាប់កំរិតណា ឈប់លាបពណ៍ខ្ញុំទៅ» ។
ទោះជាយ៉ាងណា អ្នកសារព័ត៌មាននៅមិនទាន់ទទួលបានការបកស្រាយពីសំណាក់គ្រូពេទ្យនៅមន្ទីរពេទ្យរុស្ស៊ី នៅឡើយទេ គិតត្រឹមម៉ោង៤រសៀល ថ្ងៃទី២៣ ខែឧសភា ២០១៩ នេះ ៕
