ភ្នំពេញ ៖ មុននេះបន្តិច ស្នងការដ្ឋាននគរបាលរាជធានីភ្នំពេញ បានបដិសេធទាំងស្រុងចំពោះសារព័ត៌មានទាំងឡាយដែលចុះផ្សាយថា លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មានបំណងបង្កើតក្រុមកុម្ម៉ង់ដូថ្មី ដែលនេះ ជាព័ត៌មានមិនគ្រប់ជ្រុងជ្រោយឡើយ ។
ស្នងការដ្ឋានគរបាលរាជធានីភ្នំពេញ មានបំណងកែសម្រួល និងបំប៉នក្រុមអន្តរគមន៍ដែលមានស្រាប់ ឱ្យទៅជាក្រុមអន្តរាគមន៍ពិសេស ដោយក្រុមនេះ នឹងត្រូវទទួលវគ្គបំប៉នជំនាញបន្ថែមទាំងក្នុង និងក្រៅប្រទេស ។
ថ្មីៗនេះ ក្នុងឱកាសជួបជាមួយប្រតិភូវៀតណាម លោកឧត្ដមសេនីយ៍ឯក ស ថេត អគ្គស្នងការរង និងស្នងការនគរបាលរាជធានីភ្នំពេញ បានស្នើដល់ភាគីវៀតណាម ជួយរៀបចំបើកវគ្គសិក្សាសំខាន់ៗ សម្រាប់ក្រុមអន្តរាគមន៍ពិសេសមួយនេះផងដែរ ។
សូមបញ្ជាក់ផងដែរថា កាលពីថ្ងៃទី២១ ម្សិលមិញនេះ មានសារព័ត៌មានក្នុងស្រុកជាច្រើន ក៏ដូចគេហទំព័រអគ្គស្នងការដ្ឋាននគរបាលជាតិ បានចុះផ្សាយថា ឯកឧត្ដម ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើភាគីវៀតណាម ជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលឯកឧត្ដមស្នងការ មានបំណងបង្កើតឡើង ។
ការស្នើនេះគ្រាដែលឯកឧត្ដម ឧត្ដមសេនីយ៍ឯក ស ថេត នាព្រឹកថ្ងៃទី២១ ខែឧសភា ឆ្នាំ២០១៩នេះ បានទទួលជួបគណៈប្រតិភូវៀតណាម ដែលមកបំពេញទស្សនកិច្ច នៅស្នងការដ្ឋាននគរបាលរាជធានីភ្នំពេញ។
ឯកឧត្ដមស ថេត បានថ្លែងថាឯកឧត្ដមមកកាន់តំណែង ជាស្នងការនគរបាលរាជធានីភ្នំពេញ មិនទាន់បាន១ឆ្នាំនៅឡើយទេ ដោយឯកឧត្ដមមានបំណងបង្កើតក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលមានគ្នាប្រមាណជា៦០នាក់។ ក្រុមកុម៉ង់ដូនេះ គឺត្រូវចេះរបៀបបាញ់កាំភ្លើងវែង កាំភ្លើងខ្លី និងរបៀបការពារថ្នាក់ដឹកនាំផងដែរ ។
នៅចំពោះមុខគណៈប្រតិភូវៀតណាម ឯកឧត្ដមស្នងការនគរបាល រាជធានីភ្នំពេញ បានស្នើឲ្យទទួលយកសំណើជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញនេះ រាយការណ៍ជូនថ្នាក់ដឹកនាំវៀតណាមផង ព្រោះធនធានមនុស្ស និងសម្ភារៈសម្រាប់បំពាក់នោះ គឺខាងស្នងការរាជធានីភ្នំពេញ បានជ្រើសរើស និងបញ្ជាទិញរួចរាល់ហើយ តែនៅខ្វះការបណ្ដុះបណ្ដាលលើជំនាញនេះប៉ុណ្ណោះ ។
ឯកឧត្ដម ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានឲ្យដឹងដែរ ថាចាប់ពីពេលនេះតទៅ នៅប្រទេសកម្ពុជា នឹងមានកិច្ចប្រជុំធំៗជាច្រើន ហើយក្រុមកុម៉ង់ដូនេះទៀតសោត ក៏ជួយបន្ថែមទៀតទៅលើការការពារសន្តិសុខ សណ្ដាប់ធ្នាប់ប្រជាពលរដ្ឋ នៅក្នុងរាជធានីភ្នំពេញ ឲ្យបានកាន់តែល្អប្រសើរ ថែមទៀតផង។
គណៈប្រតិភូវៀតណាម បានសន្យា ថា នឹងយកសំណើនេះទៅរាយការណ៍ ជូនថ្នាក់ដឹកនាំរបស់ខ្លួន ដើម្បីពិចារណា ទៅលើការជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ៕