ភ្នំពេញ ៖ បើតាមប្រភពពីស្នងការដ្ឋាននគរបាលរាជធានីភ្នំពេញ បានឲ្យដឹង លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើភាគីវៀតណាម ជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលលោកស្នងការ មានបំណងបង្កើតឡើង ។
ការស្នើនេះ ធ្វើឡើងនាព្រឹកថ្ងៃទី២១ ខែឧសភា ឆ្នាំ២០១៩ ពេលដែលលោកឧត្ដមសេនីយ៍ឯក ស ថេត ទទួលជួបគណៈប្រតិភូវៀតណាម ដែលមកបំពេញទស្សនកិច្ច នៅស្នងការដ្ឋាននគរបាលរាជធានីភ្នំពេញ ។
លោក ស ថេត បានថ្លែងថា លោកមានបំណងបង្កើតក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលមានគ្នាប្រមាណជា៦០នាក់ ។ ក្រុមកុម៉ង់ដូនេះ គឺត្រូវចេះរបៀបបាញ់កាំភ្លើងវែង កាំភ្លើងខ្លី និងរបៀបការពារថ្នាក់ដឹកនាំផងដែរ ព្រោះធនធានមនុស្ស និងសម្ភារៈសម្រាប់បំពាក់នោះ គឺខាងស្នងការរាជធានីភ្នំពេញ បានជ្រើសរើស និងបញ្ជាទិញរួចរាល់ហើយ តែនៅខ្វះការបណ្ដុះបណ្ដាលលើជំនាញនេះ ប៉ុណ្ណោះ ។
ចំណែកឯ គណៈប្រតិភូវៀតណាម បានសន្យាថា នឹងយកសំណើនេះ ទៅរាយការណ៍ជូនថ្នាក់ដឹកនាំរបស់ខ្លួនសិន ដើម្បីពិចារណាទៅលើការជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ៕
