ក្រុងព្រះសីហនុ ៖ នៅព្រឹកថ្ងៃទី១២ ឧសភា ២០១៩ នេះកម្លាំងនគរបាលខេត្តព្រះសីហនុ និងសមត្ថកិច្ចពាក់ព័ន្ធ រួមជាមួយនាយកដ្ឋានជំនាញ កំពុងបើកប្រតិបត្តិការស៊ើបអង្គេតយ៉ាងក្ដៅគគុក តាមស្វែងរកជនជាតិចិនមួយក្រុម ដែលបង្ហោះវីដេអូស្រែកគំរាមជាភាសាចិន ដែលមានន័យជាខ្មែរថា ចង់បង្កអសន្ដិសុខ នៅខេត្តព្រះសីហនុ ។
តាមរយៈវីដេអូឃ្លីបដែលមានរយៈពេលប្រមាណ១០វិនាទី បង្ហាញអោយឃើញពីបុរសជនជាតិចិនម្នាក់ និយាយទៅកាន់ជនជាតិចិនមួយក្រុម ប្រៀបបានទៅនឹងមេទ័ពត្រួតពលទាហានមុនធ្វើសឹក ត្រូវបានជំនាញបកប្រែជាភាសាខ្មែរថា «ពួកគេមកពីខេត្តឆុងឆីង ហើយកំពង់សោម៣ឆ្នាំក្រោយ វាចង់ឲ្យវឹកវរ គឺវឹកវរ វាចង់ឲ្យសុវត្ថិភាព គឺសុវត្ថិភាព» ។
ក្រោយពេលវីដេអូមួយឃ្លីបនេះត្រូវបង្ហោះចែកចាយតាមបណ្តាញសង្គមរួចមក នាយឧត្តមសេនីយ៍សន្ដិបណ្ដិត នេត សាវឿន អគ្គស្នងការនគរបាលជាតិ បានបញ្ជាឲ្យកម្លាំងនាយកដ្ឋានជំនាញ សហការជាមួយស្នងការដ្ឋាននគរបាលខេត្តព្រះសីហនុ ឲ្យស្រាវជ្រាវជាបន្ទាន់ និងត្រូវចាត់វិធានការច្បាប់ភ្លាម ឬត្រូវបណ្ដេញចេញពីកម្ពុជា តែម្តង ។
យោងតាមឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងប្រាប់អ្នកសារព័ត៌មានក្នុងស្រុកមួយ អោយដឹងថា បន្ទាប់ពីទទួលបានបទបញ្ជាយ៉ាងម៉ឺងម៉ាត់ ពីនាយឧត្តមសេនីយ៍សន្ដិបណ្ឌិត នេត សាវឿន លោកបានបញ្ជាកម្លាំងជំនាញ បើកការស្រាវជ្រាវភ្លាមៗផងដែរ ។យ៉ាងណារហូតមកដល់រសៀលនេះ កម្លាំងជំនាញនៃស្នងការដ្ឋាននគរបាលខេត្ត កំពុងសហការជាមួយនាយកដ្ឋានជំនាញពាក់ព័ន្ធ កំពុងស្រាវជ្រាវ ។ ប៉ុន្ដែមិនទាន់អាចបញ្ជាក់ច្បាស់ថា ជនជាតិចិន ដែលបង្ហោះវីដេអូនោះ ស្នាក់នៅឬក៏ធ្វើការនៅខេត្តព្រះសីហនុនោះទេ ពោលពឺ ស្ថិតនៅក្រោមការស្រាវជ្រាវនៅឡើយ ៕