ខេត្តបន្ទាយមានជ័យ ៖ កាលពីម៉ោង៣រសៀល ថ្ងៃទី១ ខែឧសភា ឆ្នាំ២០១៩ ស្ត្រីម្នាក់ ទៅជីកទំពាំងព្រៃ ចៃដន្យបានជាន់ចំមីនស្គរ ផលិតនៅប្រទេសចិន បណ្តាលអោយផ្ទុះដាច់ជើងម្ខាង រងរបួសធ្ងន់ នៅចំណុចអូរព្រំដែនកម្ពុជា-ថៃ ស្ថិតក្នុងភូមិតាម៉ាំង ឃុំគោករមៀត ស្រុកថ្មពួក ។
មន្ត្រីនគរបាលស្រុកថ្មពួក បានឱ្យដឹងថា ជនរងគ្រោះ មានឈ្មោះ ដុក ស្រីពៅ អាយុ៣៣ឆ្នាំ រស់នៅភូមិតាម៉ាំង ឃុំគោករមៀត ស្រុកថ្មពួក ខេត្តបន្ទាយមានជ័យ ។
នៅមុនពេលកើតហេតុ ស្ត្រីជនរងគ្រោះបានចេញពីផ្ទះ ធ្វើដំណើរឆ្ពោះទៅកាន់កន្លែងកើតហេតុ ដើម្បីទៅរកជីកទំពាំង (ឬស្សីព្រៃ) នៅក្នុងអូរព្រំដែនកម្ពុជា-ថៃ ជាតំបន់គ្រោះថ្នាក់ ស្រាប់តែជួបគ្រោះថ្នាក់បែបនេះ ភ្លាមៗអ្នកភូមិ និងនគរបាលការពារព្រំដែនគោកវរ:សេនាតូចលេខ៧០៨ ក៏បានដឹកជនរងគ្រោះ ទៅមន្ទីរពេទ្យ ខេត្តមិត្តភាពកម្ពុជា-ជប៉ុន នៅមង្គលបូរី ដើម្បីសង្គ្រោះបន្ទាន់ ៕