រាជធានីភ្នំពេញ ៖ តារាចម្រៀងប្រចាំផលិតកម្មមរតកមេឌៀ កញ្ញា គ្រីប លក្ខិណា បានសម្រេចចិត្តលើកដៃសំពះសុំជំនួយពីសប្បុរសជនទាំងក្នុងនិងក្រៅប្រទេស ដោយសារតែភាពខ្វះខាត និងចំណាយច្រើនហួសពីលទ្ធភាព ក្នុងការព្យាបាលជំងឺម្តាយដែលកំពុងមានជំងឺរលួយជើង ត្រូវការលុយច្រើនដើម្បីបន្តព្យាបាលតទៅទៀត ហើយក្រៅពីលុយព្យាបាលម្តាយ កញ្ញានៅមានបន្ទុកជាច្រើនទៀត ដូចជាចិញ្ចឹមក្មួយៗកំព្រា៨នាក់ផ្សេងទៀត ដែលជាបន្ទុកមួយដ៏ធ្ងន់សម្រាប់កញ្ញាផងដែរ ។
កន្លងមកបងប្អូនមហាជនទាំងអស់ធ្លាប់បានឃើញកញ្ញា គ្រីប លក្ខិណា សម្តែងនិងច្រៀងរាំសប្បាយតាមការប្រគុំតន្ត្រីនានា តែនាងបានបង្ហើបប្រាប់ថា នាងមានតួនាទីកំដរអារម្មណ៍ និងធ្វើឲ្យបងប្អូនមហាជនទាំងអស់ សប្បាយភ្លេចទុក្ខនានា តែចំណែកនៅក្នុងខ្លួនកញ្ញាវិញ មិនប្រាកដថាសប្បាយដូចអ្វីដែលកញ្ញាសម្តែងនៅខាងក្រៅនោះទេ គឺកញ្ញាមានទុក្ខលំបាកប៉ុនភ្នំ ណាមួយម្តាយឈឺ ណាមួយត្រូវរកលុយរាប់រងចិញ្ចឹមក្មួយៗជាច្រើននាក់នៅក្នុងបន្ទុកទៀត ។
តារាចម្រៀងស្រីខាងលើនេះ បានបញ្ជាក់ទៀតថា ដំបូងឡើយម្តាយរបស់នាង មានជំងឺដំបៅជើងបន្តិចបន្តួចប៉ុណ្ណោះ ប៉ុន្តែដោយសារមិនចង់រំខាននាងជាកូន ទើបចេះតែលាក់បាំង ហើយព្យាយាមស្វែងរកថ្នាំបុរាណ តាមការប្រាប់របស់អ្នកស្រុកភូមិមកបិទ និងត្រាំរហូតរលេះរលួយជើង ទើបនាងដឹង ហើយបញ្ជូនមកព្យាបាលនៅមន្ទីរពេទ្យ។ នាងថា ម្តាយនាងមិនមានជំងឺទឹកនោមផ្អែមទេ ខណៈដែលក្រុមវេជ្ជបណ្ឌិតលើកឡើងថា កើតឡើងពីការប្រើប្រាស់ថ្នាំខ្មែរ មិនមានបច្ចេកទេស។
នាងបន្តថា ជើងរបស់ម្តាយនាង ត្រូវបានកោសរុំថ្នាំ និងហូរឈាមច្រើនជាញឹកញាប់ ត្រូវការប្រើប្រាស់លុយច្រើនដើម្បីមើលបន្តទៀត ហើយក្រុមសិល្បៈរួមអាជីព និងផលិតករក្នុងផលិតកម្មដែលស្គាល់នាងជិតដិត បានជួយទាំងថវិកា និងផ្តល់ឈាមស្ទើរខ្សោះពីខ្លួនម្នាក់ៗទៅហើយ ហើយដោយសារតែទាល់ច្រក នាងក៏បានសម្រេចចិត្តលើកដៃសំពះសុំការជួយពីបងប្អូនសប្បុរសជនជិតឆ្ងាយ ទាំងក្នុង និងក្រៅប្រទេស មេត្តាជួយដល់ការព្យាបាលជំងឺរបស់ម្តាយនាង ទៅតាមសទ្ធាជ្រះថ្លា ព្រោះតែនាងគ្មានលទ្ធភាពបន្តទៅមុខទៀតទេ ព្រោះទ្រព្យដែលនាងបានសន្សំមកនោះ លក់គ្មានសល់ឡើយ ។
បើសប្បុរសជនមានបំណងចង់ជួយរំលែកទុក្ខនាង ជាថវិកាក្តី ជាសម្ភារៈក្តី អាចទំនាក់ទំនងជាមួយនាងផ្ទាល់ តាមរយៈទូរស័ព្ទលេខ៖ ០១៥ ២៤៣ ៤៥៦ ,០៧៨ ៧២១ ២១៣ ,០៩៨ ៧០០ ៧៣៩ និង ០៧០ ៨០០ ៩៩៣។ សូមបញ្ជាក់ថា កញ្ញា គ្រីប លក្ខិណា ក្រៅពីម្តាយនាង ក៏ត្រូវមើលថែទាំចិញ្ចឹមក្មួយប្រមាណ៨នាក់ផ្សេងទៀត ដែលកំពុងនៅសិក្សា ខណៈដែលម្តាយឪពុកពួកគេបានបោះបង់ចោលផងនោះ។ ទន្ទឹមគ្នានេះ គ្រីប លក្ខិណា ក៏សង្ឃឹមថា សប្បុរសជន នឹង ជួយម្តាយ និងក្មួយៗដែលកំពុងរស់ក្នុងទុក្ខវេទនាដោយក្តីអនុគ្រោះ៕
