ភ្នំពេញ ៖ ក្នុងពេលផ្តើមទស្សនកិច្ចផ្លូវការ នៅព្រឹកថ្ងៃទី៣០ ខែមេសា ឆ្នាំ២០១៩នេះ លោកស្រី អោង សានស៊ូជី (Aung San Suu Kyi) ទីប្រឹក្សារដ្ឋ នៃសាធារណរដ្ឋសហភាពមីយ៉ាន់ម៉ា បានអញ្ជើញធ្វើដំណើរតាមក្បួនរថយន្ត ស្រាប់តែមានយុវជនពីរនាក់ បានបើកម៉ូតូដោយបំពានដេញតាមរថយន្តក្បួនរបស់គណៈប្រតិភូជាន់ខ្ពស់ ត្រូវបានកម្លាំងនគរបាលខណ្ឌដូនពេញ ឃាត់ខ្លួនបានភ្លាមៗ ។
មន្ត្រីនគរបាលខណ្ឌដូនពេញ បានឲ្យដឹងថា នៅម៉ោងប្រមាណជា០៨និង៣០នាទីព្រឹកថ្ងៃទី៣០ មេសា នេះក្បួនគណៈប្រតិភូជាន់ខ្ពស់ នៃសាធារណរដ្ឋសហភាពមីយ៉ាន់ម៉ា បានមកដល់ចំណុចក្បែរអង្គភាពប្រឆាំងអំពើពុករលួយ ផ្លូវព្រះនរោត្តម កែងផ្លូវ១៧២ សង្កត់ផ្សារថ្មី៣ ខណ្ឌដូនពេញ ឆ្ពោះទៅវិមានឯករាជ្យ ស្រាប់តែជនសង្ស័យពីរនាក់(យុវជន) ជិះម៉ូតូប្រដេញតាមពីក្រោយក្បូនក្នុងល្បឿនលឿន មិនព្រមឈប់សោះ ស្របពេលនោះដែរ កម្លាំងអធិការដ្ឋានប៉ុស្តិ៍រដ្ឋបាលបានបញ្ចេញកម្លាំងការពារក្បូនគណៈប្រតិភូជាន់ខ្ពស់ ក៏ដេញតាមឃាត់ខ្លួន យកមកកាន់អធិការដ្ឋាន ដើម្បីធ្វើការសាកសួរ និងធ្វើតេស្តបឋម រកឃើញមានសារធាតុញៀនក្នុងខ្លួន ។
យុវជនដែលត្រូវឃាត់ខ្លួនទាំង២នាក់ មានទី១ ឈ្មោះ ចាន់ បូណា អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ និងទី២ ឈ្មោះ លី គឹមសាន អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ ។ វត្ថុតាងដែលដកហូតមានម៉ូតូមួយគ្រឿង ម៉ាក Yamaha Mio ពណ៌ខ្មៅ ស្លាកលេខ កណ្តាល 1F-9934 ។
យ៉ាងណាកម្លាំងជំនាញខណ្ឌដូនពេញ កំពុងសួរយកចម្លើយនៅឡើយ ថាត្រូវអប់រំណែនាំ ឫមួយ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធី ៕
