ខេត្តបាត់ដំបង ៖ បុរសវ័យចំណាស់ម្នាក់ កំពុងឈរអង្គុយមើលទូរទស្សន៍ នៅលើគ្រែខាងក្រោមផ្ទះ ខណៈដែលមេឃកំពុងរលឹមធ្លាក់ភ្លៀង ក៏ស្រាប់តែត្រូវរន្ទះបាញ់ផូង! ចំទូរទស្សន៍ ធ្វើឱ្យជនរងគ្រោះដែលកំពុងអង្គុយមើលជិតនឹងទូរទស្សន៍ រងរបួសសន្លប់ស្តូកស្តឹង ត្រូវបានក្រុមគ្រួសារដឹកបញ្ជូនទៅសង្គ្រោះនៅមន្ទីរពេទ្យភ្លាមៗ ។
ហេតុការណ៍នេះ បានកលតឡើងកាលពីវេលាម៉ោងជិត២រសៀល ថ្ងៃទី២៥ ខែមេសា ឆ្នាំ២០១៩ នៅចំណុចភូមិនិគមកណ្តាល ឃុំជ្រោយស្តៅ ស្រុកថ្មគោល ។
បើតាមក្រុមគ្រួសារជនរងគ្រោះ បានប្រាប់អោយដឹងថា បុរសរងគ្រោះមានឈ្មោះជិន ណារ៉ា អាយុ៦១ឆ្នាំ មុខរបរកសិករ ហើយនៅមុនពេលកើតហេតុ ជនរងគ្រោះបានអង្គុយមើលទូរទស្សន៍តែម្នាក់ឯង នៅលើគ្រែ ខាងក្រោមផ្ទះ លុះបន្តិចក្រោយមក មេឃក៏ចាប់ផ្តើមធ្លាក់ភ្លៀងរលឹមស្រិចៗ ទើបជនរងគ្រោះបានខិតទៅកាន់តែជិត ដើម្បីស្តាប់សំឡេងបានច្បាស់ ស្រាប់តែរំពេចនោះ ក៏មានផ្លេកបន្ទោរចាំងព្រាក រំពេចនោះរន្ទះក៏បានបាញ់ ចំទូរទស្សន៍ ដែលជនរងគ្រោះកំពុងអង្គុយមើល និងបណ្តាលអោយជនរងគ្រោះរងរបួសសន្លប់ស្តូកស្តឹង តែម្តង ។ ក្រោយកើតហេតុភ្លាមៗ ក្រុមគ្រួសាររួមនឹងអ្នកភូមិ ប្រញាប់ស្ទុះមកជួយគក់ច្របាច់ និងបានដឹកបញ្ជូនជនរងគ្រោះទៅកាន់មន្ទីរពេទ្យភ្លាមៗ ដើម្បីសង្គ្រោះ ។
បច្ចុប្បន្ន ជនរងគ្រោះខាងលើ ត្រូវបានក្រុមគ្រូពេទ្យសង្គ្រោះជីវិតទាន់ពេល និងកំពុងសម្រាកព្យាបាលនៅក្នុងមន្ទីរពេទ្យនៅឡើយ ៕