សៀមរាប ៖ បុរសដែលចាប់រំលោភសេពសន្ថវៈមកលើកូនស្រីបង្កើតរបស់ខ្លួន បានសម្រេចហើយ បែរជាឆ្លើយដោះសារថា ដោយសារខ្លួនមមើដោយយល់សប្ដិទេ ពេលនេះត្រូវសមត្ថកិច្ចបញ្ជូនទៅតុលាការហើយនៅព្រឹកថ្ងៃទី២៦ ខែមេសា ឆ្នាំ២០១៩ នេះ ដោយចោទប្រកាន់បទរំលោភសេពសន្ថវ:លើអនីតិជន ។
លោកវរសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងថា ជនសង្ស័យជាឪពុកមានឈ្មោះ ហ៊ា ហុន អាយុ៣៤ឆ្នាំ មុខរបរកសិករ ដែលបានចាប់រំលោភកូនខ្លួនឯងឈ្មោះហទ វ័យ១៣ឆ្នាំ ។
ឪពុកចិត្តជាតិរិច្ឆាននេះ ត្រូវសមត្ថកិច្ចឃាត់ខ្លួនបាននៅវេលាម៉ោង១៨និង៣០នាទីថ្ងៃទី២៤ មេសា នៅភូមិស្រែរបង ឃុំបឹងមាលា ស្រុកស្វាយលើ ខេត្តសៀមរាប តាមពាក្យបណ្ដឹងរបស់ម្តាយជនរងគ្រោះ ។
ក្មេងស្រីរងគ្រោះ រៀបរាប់ឲ្យដឹងថា កាលពីថ្ងៃទី១៨ មេសា នៅម៉ោង៦ល្ងាច ឪពុកបង្កើតរបស់ខ្លួន បាន ឈ្លោះប្រកែកជាមួយម្ដាយរហូតដល់យប់ ហើយម្ដាយបានចេញពីផ្ទះ ដោយនាំបងស្រីទៅជាមួយ ក្រោយមករូបនាងបាននាំប្អូនស្រីភ្លោះ ដើរទៅតាមម្ដាយ រហូតមកដល់វត្តបឹងមាលា ក៏សម្រាកនៅទីនោះ ។
លុះព្រឹកឡើង ថ្ងៃទី១៩ មេសា នៅវត្តបឹងមាលា មានការស្រង់ព្រះឆ្លងឆ្នាំ រូបនាងក៏បាននៅលេងនៅទីនោះ ។បន្ទាប់មកឪពុកក៏បាននាំទៅផ្ទះវិញ ។ រហូតដល់ម៉ោងប្រហែល៣និង៣០នាទី ទៀបភ្លឺ ឪពុកបានចាប់រំលោភ បានសម្រេចម្តង រួចក៏ទៅដេកវិញដល់ភ្លឺ ឪពុកបង្កើតខ្លួនបានដាស់ហើយប្រាប់ថា អញយប់មិញ មមើទេ(ដេកយល់សប្ដិ) កុំប្រាប់ម៉ែង៉ែង ប្រយ័ត្នម៉ែង៉ែងប្ដឹងប៉ូលិសចាប់អញដាក់គុក ។
ដោយខ្លាចឪពុកខ្លួន ក៏មិនហ៊ានប្រាប់អ្នកណាទេ រហូតដល់ថ្ងៃទី២១ មេសា វេលាម៉ោង៤ទៀបភ្លឺ ឪពុកបានធ្វើសកម្មភាពរំលោភម្ដងទៀត តែមិនបានសម្រេចទេ ដោយសារនាងដឹងខ្លួនមុន ភ្លាមៗនោះបែរជាឪពុកនិយាយថា មករកពិលទៅវិញ រួចគាត់បានទៅដេកទៅវិញ ។
លុះដល់ថ្ងៃទី២៤ មេសា ព្រោះតែខ្លាចពីសកម្មភាពឪពុកខ្លួនកើតមានដដែលទៀត រូបនាងសម្រេចចិត្តប្រាប់រឿងអោយម្ដាយដឹងតែម្ដងទៅ ហើយម្ដាយក៏មកប្តឹងសមត្ថកិច្ច ទើបសមត្ថកិច្ចឃាត់ខ្លួនឪពុកខ្លួនសាកសួរតែម្ដង ។
តាមចម្លើយសារភាពរបស់ជនសង្ស័យជាឪពុក បានអោយដឹងថា ខ្លួនបានប្រព្រឹត្តប្រាកដមែន គឺបានសម្រេចតែមួយដងគត់ ។
បច្ចុប្បន្នកម្លាំងនគរបាលជំនាញនៃស្រុកស្វាយលើ រៀបចំសំណុំរឿង បញ្ជូនមកកាន់តុលាការខេត្តសៀមរាប ដើម្បីចាត់ការបន្តតាមផ្លូវច្បាប់ ៕