រាជធានីភ្នំពេញ ៖ ជាការភ្ញាក់ផ្អើលមួយដែលលោក ទិត សុធា អ្នកនាំពាក្យទីស្ដីការគណៈរដ្ឋមន្ត្រី បានថ្លែងប្រៀបធៀបសម័យ ប៉ុល ពត ដែលគេបង្ខំឱ្យធ្វើការទាំងថ្ងៃក្តៅហែង ម៉េចក៏ចេះតស៊ូរស់បាន គ្រាន់តែខកខានប្រើប្រាស់ភ្លើងមួយរយៈ ហេតុអ្វីក៏ស្រែកថ្ងូរយ៉ាងនេះ ។
នេះជាការរៀបរាប់របស់លោក ទិត សុធា នៅតាមបណ្ដាញសង្គមហ្វេសប៊ុក កាលពីម៉ោង៥និង០៣នាទីល្ងាចថ្ងៃទី២៥ ខែមេសា ឆ្នាំ២០១៩ ម្សិលមិញនេះ ប៉ុន្តែនៅព្រឹកថ្ងៃទី២៦ មេសានេះ លោកលុបចោលបាត់ហើយ ។
យ៉ាងណាខ្លឹមសារដែលលោក ទិត សុធា បានបង្ហោះ ត្រូវបានអ្នកសារព័ត៌មានដកស្រងសំណេរទាំងស្រុង យកចុះផ្សាយយ៉ាងដូច្នេះថា «សម័យប៉ុល ពត នៅពេលគេបង្ខំឱ្យធ្វើការទាំងថ្ងៃក្តៅហែង យប់គ្មានពេលសម្រាក រស់នៅមិនបានជុំគ្រួសារ គ្មានម៉ាស៊ីនត្រជាក់ គ្មានកង្ហា គ្មានភ្លើងប្រើប្រាស់ គ្មានចំណីអាហារគ្រប់គ្រាន់ ម៉េចក៏ចេះតស៊ូរស់បាន ចុះពេលនេះ គ្រាន់តែខកខានប្រើប្រាស់ភ្លើងមួយរយៈ ហេតុអ្វីក៏ស្រែកថ្ងូរយ៉ាងនេះ ? អាចមកពីធ្លាប់បានរស់នៅសុខស្រួល ទើបពិបាកទ្រាំនឹងការលំបាក ។
ទោះយ៉ាងណារាជរដ្ឋាភិបាលបាននិងកំពុងប្រឹងប្រែងដោះស្រាយបញ្ហាភ្លើងអគ្គិសនីដែលនាំឱ្យពលរដ្ឋប្រឈមនឹងការលំបាកខ្លះៗនេះ និងបានសូមការយោគយល់ អភ័យទោសចំពោះបញ្ហាដែលបានកើតឡើង និងសូមបងប្អូនប្រជាពលរដ្ឋអត់ធ្មត់ ។ បញ្ហាខ្វះខាតភ្លើងនឹងត្រូវបានដោះស្រាយក្នុងពេលឆាប់ៗ ។
ជាការពិតដាច់ភ្លើងដូចតែគ្នា មិនថា ផ្ទះប្រជាពលរដ្ឋ ឬរដ្ឋមន្ត្រី ឬក៏ថ្នាក់ដឹកនាំរូបណាទេ ផ្ទះខ្ញុំក៏ដាច់ភ្លើងដែរពេលនេះ» ។
សូមរម្លឹកផងដែរថា ក្នុងពិធីបុណ្យទន្លេ កាលពីថ្ងៃទី១៦ មីនា ២០១៩ នៅក្នុងខេត្តកំពង់ឆ្នាំង សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏បានអំពាវនាវឱ្យប្រជាពលរដ្ឋអត់ធ្មត់ដែរ ចំពោះការខ្វះអគ្គិសនីប្រើប្រាស់នេះ ។ សម្តេចតេជោ ក៏បានណែនាំឱ្យពលរដ្ឋទិញម៉ាស៊ីនភ្លើងប្រើប្រាស់បណ្ណោះអាសន្នព្រោះថា អគ្គិសនីខ្វះរហូតដល់៤០០មេហ្គាវ៉ាត់ ៕