កូឡុំបូ,ស្រីលង្កា ៖ ប្រភពព័ត៌មានពីទូរទស្សន៍CNN បានចុះផ្សាយថា អ្នកបំផ្ទុះគ្រាប់បែកអត្តឃាតពីរនាក់ក្នុងចំណោមអ្នកបំផ្ទុះគ្រាប់បែកអត្តឃាតចំនួន៩នាក់ ពាក់ព័ន្ធនឹងការវាយប្រហារកាលពីថ្ងៃអាទិត្យ នៅស្រីលង្កា គឺជាកូនប្រុសគ្រួសារដ៏មានស្តុកស្តម្ភមួយ នៅក្រុងកូឡុមបូ ប្រទេសស្រីលង្កា ។
ជនសង្ស័យទាំងពីរនាក់នោះជាបងប្អូននឹងគ្នា ដែលត្រូវបានកំណត់អត្តសញ្ញាណបាន មានឈ្មោះថា Imsath Ahmed Ibrahim និង Ilham Ahmed Ibrahim គឺជាកូនប្រុសរបស់សេដ្ឋីជំនួញគ្រឿងទេស គឺលោក Mohamed Ibrahim ។
លោក Mohamed Ibrahim ជាម្ចាស់ក្រុមហ៊ុននាំចេញគ្រឿងទេសដ៏ធំមួយ ក្នុងប្រទេសស្រីលង្កា ត្រូវបានចាប់ខ្លួន ជាមួយនឹងមនុស្សជាច្រើននាក់ ក្រោយពេលមានការវាយប្រហារ ។
គិតមកត្រឹមព្រឹកថ្ងៃព្រហស្បតិ៍នេះ ជនសង្ស័យសរុប៧៥នាក់ ត្រូវឃាត់ខ្លួន និងសួរចម្លើយទាក់ទិនទៅនឹងករណីវាយប្រហារដ៏មហាប្រល័យនៅស្រីលង្កា ដែលបានផ្តាច់ជីវិតមនុស្ស៣៥៩នាក់ និងបង្កឲ្យរបួសខ្ទង់ ៥០០នាក់ ។
គួរជម្រាបថា ក្រុមភេរវករ ISIS ក៏បានចេញមុខអះអាងផងដែរថា ពួកគេគឺជាអ្នកនៅពីក្រោយការវាយប្រហារដ៏អាក្រក់នេះ គឺជាការសងសឹកទៅនឹងការបាញ់ប្រហារនៅវិហារសាសនាអ៊ីស្លាមកន្លងទៅ ក្នុងទីក្រុង Christchurch ប្រទេសញូស៊ីឡែន ប៉ុន្តែពុំទាន់មានភស្តុតាងណាមួយ ដែលត្រូវបានរកឃើញដោយអាជ្ញាធរស្រីលង្កា ពាក់ព័ន្ធនឹងការលើកឡើងនេះឡើយ ៕