ភ្នំពេញ ៖ ឆ្លងចរន្តអគ្គិសនីឆេះប្រអប់កុងទ័រនៅលើបង្គោលភ្លើងមួយដើម បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងរថយន្តពន្លត់អគ្គិភ័យចុះអន្តរាគមន៍ កាលពីម៉ោង១យប់រំលងអធ្រាត្រ ឈានចូលថ្ងៃទី ២៥ ខែមេសា ឆ្នាំ២០១៩ ត្រង់ចំណុចខាងមុខខ្លោងទ្វារវត្តញាណរង្សី តាមបណ្ដោយផ្លូវ៣៥៥ ស្ថិតក្នុងសង្កាត់ទួលសង្កែ២ ខណ្ឌឫស្សីកែវ ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ មានការផ្ទុះបែកចេញជាផ្កាភ្លើងចេញមកពីប្រអប់កុងទ័រភ្លើង ដែលនៅលើបង្គោលភ្លើងកើតហេតុខាងលើ រួចក៏បានលេចចេញជាអណ្ដាតភ្លើង ឆាបឆេះប្រអប់កុងទ័រភ្លើងយ៉ាងសន្ធោសន្ធៅ ។ ភ្លាមៗប្រជាពលរដ្ឋ នាំគ្នាចេញពីផ្ទះ និងបានរាយការណ៍ជូនសមត្ថកិច្ចមូលដ្ឋានឲ្យចុះអន្តរាគមន៍ ។ មួយស្ទុះក្រោយអណ្ដាតភ្លើងក៏បានឆេះរាលដាលដល់ខ្សែភ្លើង និងខ្សែកាបផ្សេងៗកាន់តែខ្លាំងឡើងៗ ប្រជាពលរដ្ឋប្រញាប់ប្រញាល់នាំគ្នា យកបំពង់ពន្លត់អគ្គិភ័យ៤ទៅ៥បំពង់ យកទៅបាញ់ពន្លត់ ៕