ភ្នំពេញ៖ បុរសម្នាក់ឌុបប្រពន្ធមកពីផ្ទះបងប្អូនទៅផ្ទះជួលវិញ ត្រូវបានរថយន្តកុងតឺន័រដឹកស៊ីម៉ង់ត៍បើកគៀរបណ្តាលឲ្យដួលបោកនឹងថ្នល់ស្លាប់ប្រពន្ធ ចំណែកប្តីរងរបួសស្រាល បង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី២១ ខែមេសា ឆ្នាំ២០១៩ នៅតាមបណ្ដោយផ្លូវជាតិលេខ៣ ភូមិក្រាំងដូងទៃ សង្កាត់ចោមចៅទី២ ខណ្ឌពោធិ៍សែនជ័យ ។
សពឈ្មោះ ជា ស្រីលី ភេទស្រី អាយុ ២០ឆ្នាំ មុខរបរកម្មកររោងចក្ររស់នៅភូមិ ជម្ពូវ័ន្ត សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិវៀល ឃុំ បុសមន ស្រុករំដួល ខេត្តស្វាយរៀង។

ប្តីរងរបួសមានឈ្មោះ វ៉ាន់ លីណា អាយុ២៥ឆ្នាំ មុខរបរកម្មកររោងចក្រ រស់នៅភូមិជាមួយគ្នា មានស្រុកកំណើតនៅ ស្រុកព្រៃឈរ ខេត្តកំពង់ចាម ជិះម៉ូតូ ម៉ាកGPX ពណ៌ ប្រផេះ ពាក់ស្លាកលេខភ្នំពេញ1HF -6421 ពីរនាក់ប្តីប្រពន្ធ បើកក្នុងទិសដៅពីត្បូងទៅជើង ។ ចំណែករថយន្តបង្ក ជារថយន្តកុងតឺន័រ ម៉ាក FUSO ពណ៌ទឹកប្រាក់ ពាក់ស្លាកលេខភ្នំពេញ 3A3143 ប្រភេទដឹកស៊ីម៉ង់ត៍ ធន់ធំ បើកក្នុងទិសដៅពីត្បូងទៅជើង ស្របគ្នា។

តាមប្រភពព័ត៌មានពីកន្លែងកើតហេតុ បានឲ្យដឹងថានៅមុនពេលកើតហេតុគេឃើញជនរងគ្រោះជិះម៉ូតូឌុបគ្នាពីរនាក់ប្តីប្រពន្ធក្នុងទិសដៅពីត្បូងទៅជើង ក្នុងល្បឿនលឿនមធ្យមលុះបើកមកដល់ចំណុចកើតហេតុ ស្រាប់តែមានរថយន្តកុងតឺន័រប្រភេទដឹកស៊ីម៉ង់ត៍ខ្នាតធំបើកបរក្នុងទិសដៅស្របជាមួយម៉ូតូរងគ្រោះ ហើយបានបើកគៀរម៉ូតូជនរងគ្រោះពីក្រោយបណ្ដាលឲ្យជនរងគ្រោះជាប្រពន្ធដួលបោកនឹងថ្នល់ បណ្តាលឲ្យបែកក្បាលហូរឈាមស្លាប់នៅកន្លែងកើតហេតុ ។

បន្ទាប់មកបុរសជាប្តីមិនដឹងប្រពន្ធរបស់ខ្លួនស្លាប់ បានហៅ រ៉ឺម៉កសណ្តោង របស់ បងប្អូនដឹកប្រពន្ធយកទៅព្យាបាល នៅមន្ទីរពេទ្យឯកជន នៅជិតកន្លែងកើតហេតុ ហើយមន្ទីរពេទ្យឯកជនមិនហ៊ានទទួលមើលឡើយព្រោះដឹងថានារីរងគ្រោះ ខាងលើបានបាត់បង់ជីវិតទៅហើយ ទើបជនរងគ្រោះជាប្តីឲ្យរ៉ឺម៉កសណ្តោងដឹកសពយកទៅកន្លែងកើតហេតុវិញ ដើម្បីឲ្យសមត្ថកិច្ចជំនាញធ្វើកោសល្យវិច័យ ។

ប្រភពព័ត៌មានបានបន្តទៀតថា ខណៈពេលគ្រោះថ្នាក់ភ្លាមៗ រថយន្តបង្កបានបើករត់ប្រមាណជាច្រើនរយម៉ែត្រ ត្រូវបានប្រជាពលរដ្ឋដេញកាក់ឃាត់បានភ្លាមៗ ចំណែកតៃកុងរថយន្តបង្កខាងលើបានចុះរត់គេចខ្លួនបាត់ស្រមោល ទុករថយន្តចោល ។

ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យ បានប្រគល់ឲ្យជំនាញចរាចរណ៍នៃការិយាល័យចរាចរណ៍ផ្លូវគោក រាជធានីភ្នំពេញដើម្បីធ្វើការវាស់វែងនិងយករថយន្តព្រមទាំងម៉ូតូរងគ្រោះយកទៅរក្សាទុកដើម្បីរង់ចាំការដោះស្រាយថ្ងៃក្រោយ ចំណែកឯសពខាងលើ សមត្ថកិច្ចជំនាញបានប្រគល់អោយក្រុមគ្រួសារដើម្បីយកទៅធ្វើបុណ្យតាមប្រពៃណីនៅស្រុកកំណើត ៕