ភ្នំពេញ ៖ បុរស​ម្នាក់​បាន​ស្លាប់​យ៉ាង​អាណោចអាធ័ម ខណៈ​កំពុង​ជិះ​ម៉ូតូ​ម្នាក់ឯង ត្រូវ​បាន​រថយន្ត​កុងតឺន័រ​បើក​មក​ពីក្រោយ​កៀរ​រួច​កិន​ជន​រង​គ្រោះ​អូស​ប្រមាណ​ជា​ជាង​១០​ម៉ែត្រ ហើយ​បន្ថែម​ល្បឿនបើក​រត់​ចូល​ទៅ​ក្រុមហ៊ុន​បាត់​ស្រមោល ។

ហេតុការណ៍​នេះ​បាន​កើតឡើង​នៅ​វេលា​ម៉ោង​៩​និង​៣០​នាទី​យប់​ថ្ងៃ​ទី​១៩ មេ​សា ២០១៩ នៅ​ចំណុច​មុខ​ក្រុមហ៊ុន​ក្រេ​ន​ស្តារ តាម​បណ្ដោយ​ផ្លូវ​ទំនប់​កប់​ស្រូវ (​ផ្លូវ​វិមាន​ឈ្នះ​ឈ្នះ​) ស្ថិត​ក្នុង​សង្កាត់​ត្រពាំង​ក្រសាំង ខណ្ឌ​ពោធិ៍​សែន​ជ័យ ។

សព​បុរស​រង​គ្រោះ​មានឈ្មោះ ល័​ក្ខ អាយុប្រមាណ​ជា​២៦​ឆ្នាំ ជិះ​ម៉ូតូ​ម៉ាក SUZUKI ស្មា​ក់​រ៉េ​វ៉ូ ពណ៌​ខ្មៅ ពាក់​ស្លាក​លេខ ភ្នំពេញ​1AR-2216 មុខរបរ​កម្មករ​សិប្បកម្ម​ឈើ មានស្រុក​កំណើត​នៅ​ភូមិ​៣២ ឃុំ​បុល​ខ្នុរ ស្រុក​ចំការលើ ខេត្តកំពង់ចាម មាន​ប្រពន្ធ និង​កូនស្រី​២​នាក់ ក្នុង​បន្ទុក​ផង​ដែរ ។

ប្រភព​ព័ត៌មាន​ពី​កន្លែង​កើតហេតុ​បាន​ឲ្យ​ដឹង​ថា មុន​ពេល​កើតហេតុ គេ​ឃើញ​ជន​រង​គ្រោះ​ជិះ​ម៉ូតូ​តែ​ម្នាក់ឯង តាម​បណ្ដោយ​ផ្លូវ​ទំនប់​កប់​ស្រូវ ក្នុង​ទិស​ដៅ​ពី​ជើង​ទៅ​ត្បូង លុះ​មក​ដល់​ចំណុច​កើតហេតុ ស្រាប់តែ​មាន​រថយន្ត​កុងតឺន័រ​មួយ​គ្រឿង មិន​ចាំ​ស្លាក​លេខ បាន​បើក​មក​ពីក្រោយ ហើយ​កៀរ​ជន​រង​គ្រោះ បណ្តាល​ឲ្យ​ដួល អូស​ទាំង​ម៉ូតូ​និង​ម្ចាស់ និង​អូស​ប្រហែល​១០​ម៉ែត្រ ហើយ​បាន​កិន​ជន​រង​គ្រោះ​ចំពាក់​កណ្ដាល​ខ្លួន​បណ្ដាល​ឲ្យ​ស្លាប់​ភ្លាម​ៗ​នៅ​នឹង​កន្លែង​កើតហេតុ រួច​រថយន្ត​បន្ត​ល្បឿន​ចូល​ទៅ​ក្រុមហ៊ុន​បាត់​ស្រមោល​តែ​ម្ដង ។

សព​ត្រូវ​សាច់ញាតិ ដឹក​យក​ទៅ​ធ្វើបុណ្យ​តាម​ប្រពៃណី​នៅ​ឯ​ស្រុក​កំណើត ។ ចំណែកឯ រថយន្ត​បង្ក និង​តៃកុង សមត្ថកិច្ច​នៅ​មិន​ទាន់​ធ្វើការ​ស្រាវជ្រាវ​រក​ឃើញ​នៅឡើយ​ទេ ៕