ភ្នំពេញ ៖ ជនសង្ស័យ ស្រេង វរ: ម្ចាស់ក្លឹប «ម៉ៃអាមី» និងស្ត្រីមេការ២នាក់ ត្រូវបានលោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីការបង្គាប់ឲ្យឃុំខ្លូននៅពន្ធនាគារ PJ ។
ការសម្រេចឃុំខ្លួននេះធ្វើឡើងនៅរសៀលថ្ងៃទី១៦ ខែមេសា ឆ្នាំ២០១៩ ក្រោយពីតំណាងអយ្យការបានចោទប្រកាន់ពីបទល្មើស «ផលិត ជួញដូរ រក្សាទុក ចាត់ចែងសម្រួលឱ្យប្រើប្រាស់ដោយខុសច្បាប់នូវសារធាតុញៀន» ។
សូមជម្រាបថា លោកចៅក្រមដដែល ក៏បានសម្រេចចេញដីការឃុំខ្លូនអ្នកពាក់ព័ន្ធ៤នាក់ផ្សេងទៀត នៅក្នុងពន្ធនាគារព្រៃស ផងដែរ ពីបទ «សមគំនិតក្នុងអំពើជួញដូរ រក្សាទុក ចាត់ចែងប្រើប្រាស់ និងសម្រួលឱ្យប្រើប្រាស់នូវសារធាតុញៀន ដោយខុសច្បាប់» ។
សូមបញ្ជាក់ថា ក្លឹបកម្សាន្ត «ម៉ៃអាមី» ស្ថិតនៅផ្លូវ៣៦០ សង្កាត់បឹងកេងកង១ ខណ្ឌចំការមន ដែលធ្លាប់ត្រូវបានអាជ្ញាធរខណ្ឌចំការមន ចុះបិទចំនួន៣លើករួចមកហើយ តែបិទមិនបាន ទើបពេលនេះលោកឧត្តមសេនីយ៍ផ្កាយ៣ ស ថេត ចុះបិទដោយផ្ទាល់តែម្តង ដោយរឹបអូសបានគ្រឿងញៀនប្រមាណជាង១០គីឡូក្រាម នៅក្នុងប្រតិបត្តិការចុះបង្ក្រាបទាំងយប់ ។ ក្រៅពីការរឹបអូសបានថ្នាំញៀន កម្លាំងនគរបាលក៏បានរឹបអូសបានឧបករណ៍ជក់ និងកែច្នៃយ៉ាងច្រើន នៅក្នុងក្លឹបផងដែរ ។ ចំពោះម្ចាស់ក្លឹប «ម៉ៃអាមី» រូបនេះ ត្រូវបានសមត្ថកិច្ចបញ្ជាក់ថា ធ្លាប់ជាប់ពន្ធនាគារចំនួន៨ឆ្នាំ ពាក់ព័ន្ធនឹងបទល្មើសគ្រឿងញៀនផងដែរ ៕
