រាជធានីភ្នំពេញ ៖ ក្រោយការឆ្មក់ចូលបង្ក្រាបនៅក្នុងក្លឹបកម្សាន្តឈ្មោះ ម៉ៃអាមី សង្កាត់បឹងកេងកងទី១ ខណ្ឌចំការមន កាលពីវេលាម៉ោង២រំលងអាធ្រាត្រ ឈានចូលថ្ងៃទី១១ ខែមេសា ឆ្នាំ២០១៩នេះ ប្រតិបត្តិការបន្តរហូតដល់រសៀលថ្ងៃទី១១ មេសាដដែលនេះ ដោយកម្លាំងសមត្ថកិច្ចជំនាញបាននិងកំពុងបន្តការស្រាវជ្រាវដោយប្រើសត្វឆ្កែ ដើម្បីហិតក្លិនរុករកគ្រឿងញៀនបន្ថែមទៀត ។
នៅព្រឹកថ្ងៃទី១២ ខែមេសា ឆ្នាំ២០១៩នេះ សមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ បានអោយដឹងថា ជាលទ្ធផលបឋមកម្លាំងសមត្ថកិច្ចរកឃើញថ្នាំញៀនប្រមាណជាង១០គីឡូក្រាមទៀត ។
ក្រៅពីការរឹបអូសបានថ្នាំញៀន១០គីឡូ កម្លាំងនគរបាលក៏បានរឹបងអូសបានឧបករណ៍ជក់ និងឧបករណ៍ផលិតកែច្នៃជាច្រើនទៀតផងដែរ ដែលក្រុមជនសង្ស័យលួចលាក់ធ្វើសកម្មភាពនៅក្នុងក្លិបតែម្តង ។
គិតមកត្រឹមពេលនេះ កម្លាំងសមត្ថកិច្ចជំនាញកំពុងសុំគោលការណ៍ថ្នាក់ដឹកនាំ ដើម្បីចាត់វិធានការទៅផ្លូវច្បាប់ ។
កាលពីម្សិលមិញនេះ ក្រោយពីធ្វើតេស្ដទឹកនោមទៅលើយុវជនជាង៥០នាក់ ដែលឃាត់ខ្លួននៅក្នុងប្រតិបត្តិការចុះបង្ក្រាបគ្រឿងញៀននៅក្លឹបកម្សាន្ដ «ម៉ៃអាមី» សមត្ថកិច្ចបានរកឃើញយុវជន មានផ្ទុកសារធាតុញៀននោះចំនួន៣២នាក់ ។
សូមជម្រាបថា ក្លិបកម្សាន្ត«ម៉ៃអាមី»មួយនេះ ស្ថិតនៅផ្លូវ៣៦០ សង្កាត់បឹងកេងកង១ ខណ្ឌចំការមន ដែលធ្លាប់ត្រូវបានអាជ្ញាធរខណ្ឌចំការមន ចុះបិទចំនួន០៣លើករួចមកហើយ តែបិទមិនបាន ទើបពេលនេះលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ចុះបិទដោយផ្ទាល់តែម្តង ៕
