ភ្នំពេញ ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ( គ.ប.ផ.ក ) បានធ្វើសន្និសីទកាសែត ដើម្បីបង្ហាញពីការចុះប្រតិបត្តិការត្រួតពិនិត្យ ឆែកឆេរ និងរឹបអូសបានឱសថខុសច្បាប់ជាច្រើនប្រភេទ មានជាអាទិ៍ ឱសថជំនួយផ្លូវភេទ ឱសថបង្កើនអារម្មណ៍ផ្លូវភេទ បង្កើនភាពស្រើបស្រាល (ថ្នាំសម្រើប) ឱសថមិនបានចុះបញ្ជិការ គ្មានលិខិតអនុញ្ញាតឲ្យនាំចូល ឱសថហួសកាលបរិច្ឆេទកំណត់ និងឱសថជាច្រើនប្រភេទផ្សេងទៀត ដែលត្រូវបានហាមឃាត់ដោយច្បាប់ ។
សន្និសីទកាសែត ការបង្ហាញពីឱសថខុសច្បាប់ទាំងនេះ បានធ្វើឡើងនៅព្រឹកថ្ងៃទី០៩ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ អគារW ។
លោកមៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានបញ្ជាក់ថា ក្នុងប្រតិបត្តិការនោះបានរឹបអូសបានឱសថបុរាណចិនសម័យ ជំនួយផ្លូវភេទបង្កើនភាពស្រើបស្រាលខុសច្បាប់ បានចំនួន១៨១៦០គ្រាប់ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម និងមិនបានចុះបញ្ជីការ គ្មានលិខិតអនុញ្ញាតឱ្យនាំចូល ហួសកាលបរិច្ឆេទកំណត់ និងត្រូវបានហាមឃាត់ដោយច្បាប់។
គួររំលឹកថា កាលពីថ្ងៃទី២៧ ខែមីនា ឆ្នាំ២០១៩ ក្រុមបង្គាប់ការកម្លាំងពិសេស នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បានចុះប្រតិបត្តិការត្រួតពិនិត្យ ឆែកឆេរផ្ទះលក់ឱសថបុរាណចិន ចំនួន៣ទីតាំង ស្ថិតនៅតាមបណ្តោយផ្លូវលេខ២១៧ (ហ្សាដឺហ្គោល) ក្នុងសង្កាត់អូរឬស្សី៤ ខណ្ឌ៧មករា ។ ក្នុងប្រតិបត្តិការនោះ បានរកឃើញឱសថជំនួយផ្លូវភេទបង្កើនភាពស្រើបស្រាល (ថ្នាំសម្រើប) មិនបានចុះបញ្ជីការ គ្មានលិខិតអនុញ្ញាតឱ្យនាំចូលហួសកាលបរិច្ឆេទកំណត់ និងត្រូវបានហាមឃាត់ដោយច្បាប់ជាង២ម៉ឺនគ្រាប់ ។
លោកបន្ថែមថា ម្ចាស់ទីតាំងទាំង៣ ត្រូវបានកម្លាំងពិសេសនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ កំពុងកសាងសំណុំរឿង សហការជាតុលាការដើម្បីកំណត់ស្ថានទោស ។ ក្រោយពីការត្រួតពិនិត្យរបស់សមត្ថកិច្ច ក្រោមការឯកភាពពីព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ឱ្យផ្អាកអាជីវកម្មទាំង៣ទីតាំងជាបណ្តោះអាសន្ន ហើយសមត្ថកិច្ចកំពុងបន្តសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ។
តាមច្បាប់កម្ពុជា អ្នកជួញដូរនឹងត្រូវប្រឈមមុខជាប់ពន្ធនាគារ ពី៥ឆ្នាំទៅ១០ឆ្នាំ និងពិន័យជាប្រាក់ចំនួន៥០លានរៀល។ ប៉ុន្តែទោះយ៉ាងណា ម្ចាស់ទីតាំងទាំង៣ ដែលគេស្គាល់ថាជាកន្លែងលក់ឱសថសម័យ បុរាណចិន ដ៏ធំនោះត្រូវបានដាក់ក្នុងការឃ្លាំមើលពីសមត្ថកិច្ច និងតុលាការ ដោយរង់ចាំការស្រាវជ្រាវប្រមូលព័ត៌មាន និងការពិសោធន៍រកលទ្ធផលគ្រប់ជ្រុងជ្រោយ ។
ឱសថផ្លូវភេទ ត្រូវបានគេដាក់លក់តាមប្រព័ន្ធអនឡាញយ៉ាងព្រោងព្រាត ដែលរួមមានតាមគេហទំព័រ និងបណ្តាញសង្គមហ្វេសប៊ុកដថែមទៀត ចំពោះករណីនេះ លោកមៀច សុផាន់ណា បានបញ្ជាក់ប្រាប់ថា សមត្ថកិច្ចរបស់លោក បាននិងកំពុងធ្វើការស្រាវជ្រាវតាមបច្ចេកទេសជំនាញផងដែរ ដើម្បីឈានទៅចាត់វិធានការដល់ការឃោសនាលក់ឱសថបម្រើផ្លូវភេទតាមអនឡាញនេះ ៕