ភ្នំពេញ ៖ សន្តិសុខឯកជនចំនួន៣រូប ដែលក្រុមហ៊ុនកាត់ដេរមួយកន្លែងជួលឲ្យមកយាមកាម ការពារទ្រព្យសម្បត្តិ ត្រូវបានបុរសជនជាតិចិនម្នាក់ដែលជាថៅកែរោងចក្រដេញវាយផ្អើលដល់កម្មករ ព្រោះខឹងនឹងសន្តិសុខទាំង៣នាក់ មិនជួយពេលសត្វឆ្កែចិញ្ចឹមមួយក្បាល(ឆ្កែប៊ែកហ្សេ) ខាំជនជាតិចិនម្នាក់ ជាមិត្តភក្តិរបស់ថៅកែរោងចក្រ ឲ្យរងរបួសធ្ងន់ ។
ហេតុការណ៍នេះបានកើតឡើងកាលពីវេលាម៉ោង៩នឹង៣០នាទីព្រឹកថ្ងៃទី១៨ ខែមីនា ឆ្នាំ២០១៩ ស្ថិតនៅក្នុងរោងចក្រកាត់ដេរមួយកន្លែង នៅតាមបណ្តោយផ្លូវវែងស្រេង ក្នុងសួនឧស្សាហកម្មវឌ្ឍនៈ អាគារC ក្នុងភូមិទួលពង្រ សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ ។
សន្តិសុខដែលត្រូវថៅកែចិនវាយ រួមមាន ៖ ទី១ មេតំបន់ មានឈ្មោះ នួន ដេត អាយុ៤០ឆ្នាំ ស្នាក់នៅទួលពង្រ, ទី២ ឈ្មោះទូច រុំ អាយុ៣៣ឆ្នាំ ស្នាក់ក្នុងរោងចក្រកើតហេតុ, និងទី៣ ឈ្មោះហៀង រុង អាយុ១៩ឆ្នាំ ស្នាក់បន្ទប់ជួល ក្នុងតំបន់កាណាស៊ីធី ។
បើតាមសម្តីរបស់ក្រុមសន្តិសុខខាងលើ បានប្រាប់អោយដឹងថា មូលហេតុដែលថៅកែរោងចក្រវាយពួកគាត់គឺផ្តើមចេញពីរឿងឆ្កែធំមួយក្បាល ដែលថៅកែរោងចក្រយកមកចឹញ្ចឹមនៅក្នុងរោងចក្រ ហើយនៅព្រឹកថ្ងៃទី១៧ ម្សិលមិញនេះ ឆ្កែប៊ែកហ្សេមួយក្បាលនេះ បានខាំបុរសជនជាតិចិនម្នាក់ ដែលត្រូវជាមិត្តភក្ដិរបស់ថៅកែរោងចក្រ ដែលទើបមកពីស្រុកចិន បណ្តាលឱ្យរងរបួសជាច្រើនកន្លែង ត្រូវបានបញ្ជូនទៅព្យាបាលនៅមន្ទីរពេទ្យ ផងដែរ ។
ក្រុមសន្តិសុខខាងលើ បន្តថា ខណៈពេលឆ្កែកំពុងវាយប្រហារនោះ ពួកគាត់មិនហ៊ានចូលទៅជួយទេ ព្រោះឆ្កែនោះធំពេក ណាមួយពួកគាត់ខ្លាចឆ្លែខាំដែរ ទើបមិនហ៊ានចូលទៅជួយ ជាហេតុធ្វើអោយលោកថៅកែរោងចក្រខឹងសម្បារនឹងពួកគាត់យ៉ាងខ្លាំង ហើយបានស្រែកហៅពួកគាត់ទៅជួប ពេលនោះថៅកែបានដាល់និងទាត់ធាក់យ៉ាងចាស់ដៃមកលើពួកគាត់ទាំងកំរោលតែម្ដង ។
នៅរសៀលថ្ងៃទី១៨ មីនា នេះដោយសារពួកគាត់ទាំង៣នាក់ កើតទុក្ខមិនសុខចិត្ត ក្រោយពេលបញ្ចប់ការងារពួកគាត់បាននាំគ្នាទៅប្តឹងសមត្ថកិច្ច ដើម្បីឲ្យដោះស្រាយរកយុត្តិធម៌ផង ៕
