សៀមរាប ៖ ជនជាតិជប៉ុនចំនួន២នាក់ ត្រូវបានសមត្ថកិច្ចនៃអធិការដ្ឋាននគរបាលស្រុកពួក តាមចាប់ខ្លួនបានភ្លាមៗ បន្ទាប់ពីពួកគេទាំង២នាក់ បានធ្វើសកម្មភាពអាករសម្លាប់ម្ចាស់រថយន្តតាក់ស៊ីដើម្បីប្លន់យករថយន្ត រួចទម្លាក់សពម្ចាស់រថយន្តតាក់ស៊ីនៅលើកំណាត់ផ្លូវជាតិលេខ៦ រួចបើករត់គេចខ្លួនបានចម្ងាយ៣០០ម៉ែត្រ ក៏បានបុកជាមួយគោយន្តកន្ត្រៃដឹកស្រូវដែលបើកស្របទិសគ្នា ហើយត្រូវបានសមត្ថកិច្ចចាប់ខ្លួនបានតែម្តង ។
ហេតុការណ៍អារ.កសម្លាប់អ្នករត់តាក់ស៊ីនោះបានកើតឡើងនៅវេលាម៉ោង៥ល្ងាច ថ្ងៃទី១៧ ខែមីនា ឆ្នាំ២០១៩ ស្ថិតនៅលើកំណាត់ផ្លូវជាតិលេខ៦ ត្រង់ចំណុចជញ្ជីញថ្លឹងរថយន្ត ក្នុងទឹកដីភូមិគោកដូង ឃុំពួក ស្រុកពួក ខេត្តសៀមរាប ។
លោកវរសេនីយឯក ទេព ពុំសែន អធិការនគរបាលស្រុកពួក បានអោយដឹងថា ជនសង្ស័យទាំង២មានឈ្មោះ ISHIDA REIMON ភេទប្រុស អាយុ២៤ឆ្នាំ និងម្នាក់ទៀតមានឈ្មោះ NAKA KUKI RYUJI (ជាជនដៃដល់) ភេទប្រុស អាយុ២៤ឆ្នាំ បានចូលមកកម្ពុជា នៅថ្ងៃទី១៦ ខែមីនា ឆ្នាំ២០១៩ តាមច្រកប៉ោយប៉ែត ។
ចំណែកជនរងគ្រោះមាន ឈ្មោះ ហ៊ឹម ចាន់ ភេទប្រុស អាយុ៤០ឆ្នាំ មុខរបរត់រថយន្តតាក់ស៊ី មាន ប្រពន្ធឈ្មោះ សុខ ចាន់ធឿន អាយុ៣៨ឆ្នាំ មានកូន៤នាក់ ប្រុស៣ ស្រី១ ទីលំនៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ បច្ចុប្បន្នស្នាក់នៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប ។
ជុំវិញករណីឃាតកម្មខាងលើនេះបង្កឡើងដោយជនសង្ស័យជាជនជាតិជប៉ុន ចំនួន២នាក់ បានចូលមកកម្ពុជាកាលពីថ្ងៃទី១៦ មីនា តាមច្រកប៉ោយប៉ែត លុះដល់ល្ងាចថ្ងៃទី១៧ ខែមីនា ជនជាតិជប៉ុនទាំង២នាក់ បានហៅតាក់ស៊ីម៉ាក ហាយឡិនឌឺ ពណ៌ស្ករ ស្លាកលេខ ភ្នំពេញ 2AB 5218 ជិះពីប៉ោយប៉ែត ចូលមកខេត្តសៀមរាប ។ លុះជិះមកដល់ចំណុចជញ្ជីងថ្លឹងរថយន្តនៅស្រុកពួក ជនសង្ស័យជនជាតិជប៉ុនទាំង២នាក់ បានធ្វើសកម្មភាពអារកម្ចាស់រថយន្តតាក់ស៊ីនោះ រួចទម្លាក់ម្ចាស់រថយន្តតាក់ស៊ីនៅលើផ្លូវជាតិលេខ៦ បង្កឲ្យមានការភ្ញាក់ផ្អើលដល់សមត្ថកិច្ច ។ ក្រោយពីទម្លាក់ជនរងគ្រោះចេញពីរថយន្ដនៅចំណុចកើតហេតុខាងលើរួចមក ជនសង្ស័យបានបើករថយន្ដគេចខ្លួនទៅទិសខាងកើត បានចម្ងាយប្រហែល៣០០ម៉ែត្រ រួចបានបុកជាមួយគោយន្ដកន្ដ្រៃដឹកស្រូវ បើកស្របទិសគ្នា ធ្វើឲ្យរថយន្ដបើកទៅមុខលែងរួច ។ ជនសង្ស័យទាំង២នាក់បានគេចខ្លួន ហើយត្រូវបានកម្លាំងតាមឃាត់ខ្លួនបានភ្លាមៗ ទាំង២នាក់ យកមកកាន់អធិការដ្ឋាននគរបាលស្រុក ។
ក្រោយពីចាប់ខ្លួន សមត្ថកិច្ចបានធ្វើការដកហូតប៉ាស្ព័រចំនួន២ រថយន្ដ១គ្រឿង និងសាកសពប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
បច្ចុប្បន្នជនសង្ស័យជនជាតិជប៉ុនទាំង២នាក់ ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការខេត្ត ដើម្បីចាត់ការតាមផ្លូវច្បាប់ ៕