កំពង់ធំ ៖ កម្លាំងអាវុធហត្ថខេត្តកំពង់ធំ សហការជាមួយអាជ្ញាធរដែនដី បានចុះបង្ក្រាបទីតាំងធ្វើសិប្បកម្មរុករករ៉ែមាសខុសច្បាប់ នៅ៣គោលដៅផ្សេងគ្នា ស្ថិតនៅក្នុងឃុំសុខចិត្ត ស្រុកសណ្តាន់ ខេត្តកំពង់ធំ ។
ការចុះប្រតិបត្តិការនេះធ្វើឡើងនៅវេលាម៉ោង៣រសៀល តាំងពីថ្ងៃទី១១រហូតដល់ថ្ងៃទី១៤ ខែមីនា ឆ្នាំ២០១៩ ដោយជនជាតិចិន៨នាក់ កំពុងធ្វើសិប្បកម្មរ៉ែដោយខុសច្បាប់ ត្រូវបានឃាត់ខ្លួន នាំយកមកសាកសួរ ។
សូមបញ្ជាក់ថា ទីតាំងតំបន់ភ្នំជី គឺជាតំបន់រ៉ែមាស ស្ថិតនៅក្នុងឃុំមានរិទ្ធ ស្រុកសណ្តាន់ ខេត្តកំពង់ធំ និងជាកន្លែងប៉ងប្រាថ្នារបស់ក្រុមអ្នកវិនិយោគ រីក្រុមហ៊ុនលោតឆ័ត្រ ដែលចូលចិត្តប្រើល្បិចកន្ទេលធំបន្លំដេក ដោយសំអាងលើលិខិតអនុញ្ញាតិស្រាវជ្រាវរាប់សិបឆ្នាំមកហើយ ហើយនាំគ្រឿងចក្រទំនើបៗធុនយក្សមកប្រកបអជីវកម្មរ៉ែ បន្តការងារស្រាវជ្រាវរហូតចង់អស់រ៉ែពីក្នុងដី ។
លទ្ធផលបង្ក្រាបនៅតំបន់បរតាពេជ្រ សមត្ថកិច្ចបានរឹបអូសបានរួមមាន ៖
ទី១ម៉ាស៊ីនភ្លើង៣គ្រឿង ម៉ាក (Nisho) Isokva និង២គ្រឿងទៀត មិនស្គាល់ម៉ាក
ទី២ ស៊ីទែនប្រេង Tela ចំណុះ២,០០០លីត្រចំនួន១
ទី៣ ឌីណាម៉ូចំនួន៤គ្រឿង (តូច២ ធំ២) ក្បាលកិនថ្មរ៉ែ២, ម៉ាស៊ីនក្រឡុកស៊ីម៉ង់១គ្រឿង
ទី៤ អង្គប់កិនថ្ម រ៉ែ៣គ្រឿង, កញ្ច្រែងរែងថ្មរ៉ែ២គ្រឿង, តៅច្រកថ្មរ៉ែ១
ទី៥ ម៉ាស៊ីនភ្លើងតូច១គ្រឿង, ម៉ាស៊ីនស្វានបាញ់ខ្យល់ម៉ាក (kaishan) iso១គ្រឿង, ម៉ាស៊ីនយោងថ្មរ៉ែម៉ាកJd១គ្រឿង, ម៉ូទ័របូមខ្យល់១គ្រឿង, ទុយោបូមទឹក៤ដុំ
និងទី៦ ម៉ាស៊ីនខួងថ្មម៉ាក (corteh) ១គ្រឿង ។
តំបន់បរតាពេជ្រ (ទី២)ស្ថិតនៅឃុំខាងលើ សម្ភារដកហូត ៖ មិនមានសម្ភារដកហូតទេ ការិយាល័យទើបសាងសង់ ។
ចំណែកនៅតំបន់បររាត្រី សមត្ថកិច្ចបានដកហូត ម្សៅសូដា caustic soda ១បាវ ស្មើ២៥គីឡូក្រាម ចំនួន១៦០បាវ, អាស៊ីតទំម្ងន់២៥គីឡូក្រាម ចំនួន៣០បាវ, ម៉ាស៊ីនភ្លើង kw01គ្រឿង, ធុងជ័រចំនួន១២ធុង, ម៉ូទ័របូមទឹក២គ្រឿង, ទុយោជ័រ១ដុំ, ទុយោជ័ររឹង១ដុំ, ទុយោជ័ររឹងខ្មៅ២ដុំ សម្ភារៈទាំងអស់ ត្រូវបានរក្សាទុកកន្លែងមាន សុវត្តិភាព។
បើតាមមន្ដ្រីចុះទៅចូលរួមមានអាវុធហត្ថខេត្ត១៤នាក់ កម្លាំងស្រុក៦នាក់ រថយន្ត៤គ្រឿង សហការជាមួយកម្លាំងអាវុធហត្ថផ្ទៃប្រទេស, ក្រសួងរ៉ែ និងថាមពល, អភិបាលរងខេត្ត អភិបាលស្រុក នគរបាលខេត្ត ប៉ុស្តិ៍ មេឃុំ ក្រោមការសម្របសម្រួលដោយ លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ៕
