ភ្នំពេញ ៖ ស្ងាត់ៗ លោក Jack Ma មហាសេដ្ឋីរបស់ចិន និងប្រធានក្រុមហ៊ុន Alibaba បានមកធ្វើទស្សនកិច្ចនៅខេត្តសៀមរាប ដើម្បីទស្សនាប្រាង្គប្រាសាទខ្មែរ ។
វត្តមានរបស់មហាសេដ្ឋីលំដាប់ពិភពលោករូបនេះពេលមកដល់ព្រលានយន្តហោះអន្តរជាតិសៀមរាបភ្លាម លោកបានផ្តល់កិត្តិយស ឲ្យអ្នកនិយមលេងនៅលើបណ្ដាញទំនាក់ទំនងសង្គមហ្វេសប៊ុក ថតរូបលោក ។
បើតាមមន្ត្រីនៅព្រលានយន្តហោះខេត្តសៀមរាប បានឲ្យដឹងថា លោក Jack Ma បានមកដល់ព្រលានយន្តហោះអន្តរជាតិខេត្តសៀមរាប នាវេលាម៉ោង៧និង៣០នាទីយប់ថ្ងៃទី១១ ខែមីនា ឆ្នាំ២០១៩ ។
ប្រភពដដែល បានឲ្យដឹងបន្តថា លោក Jack Ma មកទស្សកិច្ចខេត្តសៀមរាបតាមរយៈក្រុមហ៊ុន ប៊ុនម៉ា ដែលជាក្រុមហ៊ុនធំមួយកំពុងវិនិយោគមជ្ឈមណ្ឌលពាណិជ្ជកម្មនៅក្រុងប៉ោយប៉ែត ប៉ុន្តែគេមិនដឹងថា លោកនឹងស្នាក់នៅកម្ពុជាប៉ុន្មានថ្ងៃ និងគ្រោងជួបមន្ត្រីណា នៅឡើយទេ ។
ប្រភពព័ត៌មានដដែលបន្ថែមថា នាព្រឹកថ្ងៃទី១២ មីនានេះ លោក Jack Ma បានស្នាក់នៅក្នុងខេត្តសៀមរាប និងកំពុងទស្សនាប្រាសាទអង្គរវត្ត ក្នុងតំបន់រមណីយដ្ឋានអង្គរ ហើយលោកនឹងធ្វើដំណើរកំសាន្តនៅក្រុងប៉ោយប៉ែត ខេត្តបន្ទាយមានជ័យ និងចូលកំសាន្តនៅរមណីយដ្ឋានភូមិជ្រៃ នាក្រុងប៉ោយប៉ែត ផងដែរ ។
ដោយឡែក ប្រភពព័ត៌មានពីមន្ត្រីដែលសុំមិនបញ្ចេញឈ្មោះ បានឲ្យដឹងថា លោក Jack Ma ក្រៅពីមកទស្សនកិច្ចកម្ពុជា ក្នុងនាមជាភ្ញៀវទេសចរណ៍ លោកក៏នឹងស្វែងរកឱកាសវិនិយោគ នៅកម្ពុជាផងដែរ ៕
