រាជធានីភ្នំពេញ ៖ តារាសម្តែង កុល ដាវី និងអ្នកចម្រៀងសម្បុរខ្មៅស្រអែម សុខ រក្សា បានដឹកដៃគ្នាចូលរោងការនៅថ្ងៃទី៨ ខែមីនា ឆ្នាំ២០១៩ នេះ ហើយដែលចំនឹងថ្ងៃទិវានារីអន្តរជាតិ តែម្តង ហើយការក្រាបផ្ទឹមនៅពេលនេះ ដើម្បីបញ្ចប់ការរិះគន់ទាំងឡាយថា ពួកគេសាងស្នេហ៍ឥតខាន់ស្លា៧ឆ្នាំ កន្លងមក ។
ពិធីមង្គលការរបស់កុល ដាវី និងអ្នកចម្រៀងផលិតកម្មសាន់ដេ សុខ រក្សា បានរៀបចំតាមប្រពៃណីខ្មែរនៅផ្ទះរបស់នាង បុរីជីបម៉ុង ខណ្ឌសែនសុខ និងបន្តទៅធ្វើពិធីជប់លៀងធំនៅមជ្ឈមណ្ឌលកោះពេជ្រ អគារ C ដែលមានភ្ញៀវប្រមាណ៥០០នាក់ត្រូវ បានហៅឱ្យចូលរួមពិសាភោជនាហារ និងផឹកស៊ី សប្បាយរីករាយនៅរាត្រីនេះ ។
កុល ដាវី បានថ្លែងថា “ខ្ញុំធ្វើពិធីតាមប្រពៃណីទាំងអស់ហ្នឹង នៅផ្ទះខ្ញុំបុរីជីបម៉ុងលែន ជិតផ្សារអ៊ីអន២ ។ អ្នកកាសែតអាចទៅយកព័ត៌មានបានដោយរីករាយ ។ ចំណែកពេលល្ងាច វិញ ខ្ញុំធ្វើពិធីជប់លៀងនៅកោះពេជ្រ អគារ C ហៅភ្ញៀវ៥០តុ (៥០០នាក់) ក្នុងនោះ មានអ្នកសិល្បៈពាក់កណ្តាល និងអ្នករកស៊ី ស្គាល់គ្នា រាប់អានគ្នាពាក់កណ្តាល ។ ល្ងាចហ្នឹង អ្នកកាសែតក៏អាចមកបានដែរស្វាគមន៍ទាំងអស់” ។
មុនថ្ងៃចូលរោងការនេះ កុល ដាវី និងសុខ រក្សា ក៏ទទួលបានចំណងដៃទឹកប្រាក់ចំនួន៥ពាន់ដុល្លារ ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ផងដែរ ដែលធ្វើឱ្យទាំង ដាវី និងរក្សា រំភើបរីករាយចិត្តយ៉ាងខ្លាំង ៕
