ខេត្តកែប ៖ ការិយាល័យនាវាចរគយនៃនាយកដ្ឋានបង្ការ និងបង្ក្រាបបទល្មើស បានធ្វើការបង្ក្រាបនិងចាប់ឃាត់បានទូកដឹកបារីគេចពន្ធមួយគ្រឿង ដែលផ្ទុកបារីចំនួន១,១២៩ កាតុង នៅចំណុចចន្លោះកោះពោធិ៍ និងកោះអាចម៍សេះ ស្ថិតក្នុងខេត្តកែប ។
យោងតាមបណ្ដាញទំនាក់ទំនង សង្គមហ្វេសប៊ុក របស់អគ្គនាយកដ្ឋាន គយនិងរដ្ឋាករ នៅថ្ងៃទី២៥ ខែកុម្ភៈ ឆ្នាំ២០១៩នេះបានឲ្យដឹងថា នេះជាលើកទី១ហើយដែលការិយាល័យ នាវាចរគយធ្វើការបង្ក្រាបអំពើគេចពន្ធនេះ បន្ទាប់ពីទទួលបាននាវាល្បាតគយ ចំនួនពីរគ្រឿងដែលជាជំនួយរបស់រដ្ឋាភិបាល ជប៉ុនផ្តល់ជូនរាជរដ្ឋាភិបាល កម្ពុជា ក្រោមកម្មវិធីអភិវឌ្ឍ កាលពីថ្ងៃទី ២៥ ខែមករា ឆ្នាំ២០១៩ ក្រោមអធិបតីភាពលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីសំណាក់លោក HORINOUCHI Hidehisa ឯកអគ្គរាជទូតវិសាមញ្ញនិងពេញសមត្ថភាព នៃប្រទេសជប៉ុន ប្រចាំនៅព្រះរាជាណាចក្រកម្ពុជា។
ដូចដែលបានគូសបញ្ជាក់ ក្នុងពិធីសម្ពោធដាក់ឱ្យប្រើប្រាស់ នាវាល្បាតគយ លោក អូន ព័ន្ធមុនីរ័ត្ន ឧបនាយករដ្ឋមន្ត្រី បានរំពឹងថាការបំពាក់នាវាល្បាតគយ ចំនួន ២គ្រឿងនេះ នឹងចូលរួមចំណែក យ៉ាងសំខាន់បន្ថែមទៀតក្នុងការ ពង្រឹងសមត្ថភាព និងប្រសិទ្ធិភាពក្នុងការបង្ការ ទប់ស្កាត់និងបង្ក្រាបអំពើរត់គេចពន្ធ នៅក្នុងភូមិសាស្ត្រសមុទ្ទនិង តំបន់ឆ្នេរនៃព្រះរាជាណាចក្រកម្ពុជា ហើយក៏អាចចូលរួមក្នុងការពង្រឹងសន្តិសុខលំហរ សមុទ្ទកម្ពុជាផងដែរ៕
