រាជធានីភ្នំពេញ ៖ រថយន្តធុនយក្សដឹកកុងតឺន័រ និងថែមឥវ៉ាន់យ៉ាងសន្ធឹកបន្ធាប់ទៀត បានចូលក្រុងទាំងព្រឹក នៅវេលាម៉ោងជាង៧ ថ្ងៃទី២៦ ខែកុម្ភៈ ឆ្នាំ២០១៩នេះ នៅចំណុចស្ពានអាកាសស្ទឹងមានជ័យ បណ្តាលឱ្យមានការកកស្ទះ និងដោយសាររថយន្តខាងលើធ្វើឱ្យបាក់ដៃស្ពានថែមទៀត ។
រថយន្តដឹកទំនិញធុនធំចូលក្រុងបង្កឲ្យស្ទះចរាចរណ៍ទាំងព្រឹកនេះ ហាក់ដូចជាបម្រាមរបស់សាលារាជធានីគ្មានប្រសិទ្ធភាពអ្វីសោះ ។
ប្រជាពលរដ្ឋដែលធ្វើដំណើរ បានសួរគ្នាថា តើឯណាទៅប្រសិទ្ធភាពបម្រាមរថយន្តធំៗចូលក្រុងនោះ ? គេបានដឹងថា បើយោងតាមបម្រាមរថយន្តធុនធំ អាចចូលក្រុងបានចាប់ពីម៉ោង៩យប់ដល់ម៉ោង៥ភ្លឺ ហើយក្រោយមកដូរឱ្យចូលបានចាប់ពីម៉ោង៨យប់ ប៉ុន្តែរថយន្តទាំងនោះបានបោលចូល មកបន្តកន្ទុយគ្នា គ្មានលស់ពេល ដែលជាធម្មតាចរាចរណ៍ក្នុងក្រុងមានការមមាញឹកបំផុត ចាប់ពីវេលាម៉ោង៦ព្រឹក រហូតដល់ម៉ោង៨យប់ ។ ហេតុអ្វីបានជាច្បាប់មិនត្រូវបានអនុវត្តន៍ ឬមន្ត្រីនគរបាលចាំចាប់តែប្រជាពលរដ្ឋជិះម៉ូតូអត់ពាក់មួកសុវត្ថិភាព ឬអត់ពាក់ខ្សែក្រវ៉ាត់ ចុះចំពោះរថយន្តធំៗដែលបើកបំពានច្បាប់ ម៉េចក៏មិនទាន់ឃើញមន្ត្រីអាជ្ញាធរណាមួយអើពើពីបញ្ហានេះដែរ ប្រហែលជាយល់ថា បញ្ហាតូចតាច ?
ប្រជាពលរដ្ឋខ្លះចាត់ទុកថា ក្រុមរថយន្តដឹកទំនិញធុនធំ និងរថយន្តកុងតឺន័រ មានអំណាចខ្លាំងជាងអាជ្ញាធរហើយមើលទៅ ទើបបង្កព្យុះភ្លៀងស្រេចតែចិត្តបែបនេះ ៕