រាជធានីភ្នំពេញ ៖ ហ្វេសប៊ុកផេក ផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ត្រូវជនអនាមិក(Hacker) ចូលគ្រប់គ្រង នៅវេលាម៉ោងប្រមាណជាជិត១២ថ្ងៃត្រង់ ថ្ងៃទី២៥ ខែកុម្ភៈ ឆ្នាំ២០១៩នេះ បន្ទាប់ពីពួកគេលួចចូលហើយ បានលុបទិន្នន័យជាបន្តបន្ទាប់ និងនិងបង្ហោះព័ត៌មានមិនពិត ។
ខណៈជនអនាមិកកំពុងគ្រប់គ្រងនោះ បានសរសេរនៅលើ Facebook ផ្លូវការរបស់សម្តេចតេជោ យ៉ាងដូច្នេះថា ៖ «ក្រុមហ៊ុន ហ្វេសប៊ុក បានលុប និងព្យាយាមបិទគណនីរបស់ខ្ញុំ ។ តែខ្ញុំ ហ៊ុន សែន សូមប្រាប់ទៅវិញថា “បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនិងបិទលែងឲ្យប្រើហ្វេសប៊ុកនៅស្រុកខ្មែរ” ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់អំពីការចូល Hack នេះថា «នៅមុននេះបន្តិច មានក្រុមឧក្រឹដ្ឋកម្មបច្ចេកវិទ្យា (Hacker) បានចូលមកលួច Account Facebook ខ្ញុំ ហើយបានលួចលុបទិន្នន័យព័ត៌មានអស់មួយចំនួនធំ ។ ពេលនេះ ខាងក្រុមហ៊ុន Facebook កំពុងសើបអង្កេតជនអគតិ ដែលមានចេតនាអាក្រក់បំពុល និងបំផ្លាញព័ត៌មាន នៅក្នុងសង្គមជាតិយើង» ។
បើតាមសង្កេតមើល នៅលើផេកហ្វេសប៊ុកផ្លូវការរបស់សម្តេចតេជោ ហ៊ុន សែន ឃើញថា ទិន្នន័យមួយចំនួនត្រូវ បានលុបបាត់អស់ជាច្រើន នៅសល់រូបភាពឆ្នាំ២០១៣ និងឆ្នាំ២០១៤ តែប៉ុណ្ណោះ ។
ទាក់ទិននឹងករណីនេះដែល យើងមិនទាន់មានការបកស្រាយអំពីព័ត៌មាននេះ ពីអ្នកនាំពាក្យរដ្ឋាភិបាលលោក ផៃ ស៊ីផាន បានទេ ៕
