ភ្នំពេញ ៖ ទំនិញ​ចំនួន​០២​ទូរ​កុង​តៃ​ន័​រ (​ទូរ​ក្លា​សេ​) មាន​ទំងន់​សរុប​៤០​តោន ត្រូវ​បាន​សមត្ថកិច្ច​ជំនាញ​កាំកុងត្រូល​រក​ឃើញ​សង្ស័យ​មិន​ប្រក្រតី ព្រោះ​ក្រោយ​ពេល​ពិនិត្យ​មិនឃើញ​មាន​ឯកសារ​ផ្លូវច្បាប់​ត្រឹមត្រូវ តែ​រក​មិនឃើញ​មាន​សារធាតុ​គីមី​ហាមឃាត់​នៅ​លើ​សាច់​មាន់ ទោះ​យ៉ាងណា​ជំនាញ​បាន​សម្រេច​បិទ​ឃ្លុំបេ​ចោល​សិន រង​ចាំ​ធ្វើការ​ស្រាវជ្រាវ​បន្ដ​ទៀត

នៅ​ល្ងាច​ថ្ងៃ​ទី​២១ ខែកុម្ភៈ ឆ្នាំ​២០១៩ មន្ត្រី​សាខា​កាំកុងត្រូល​ផែស្ងួត​ចុង​ទី​ភ្នំពេញ និង​សាខា​កាំកុងត្រូល​កំពុង​ផែ​អន្តរជាតិ​ភ្នំពេញ ដោយ​មានការ​ចូលរួម​សហការ​ពី​ព្រះរាជអាជ្ញា​រង និង​លោក​អភិបាលរង​ខណ្ឌ​ច្បារ​អំពៅ បាន​ចុះ​ពិនិត្យ​ឃ្លាំង​ស្តុក​ចែកចាយ​សាច់​មាន់​ចម្រុះ​០១​កន្លែង នៅ​សង្កាត់​ក្បាលកោះ ខណ្ឌ​ច្បារ​អំពៅ រាជធានី​ភ្នំពេញ ។

ក្នុង​សកម្មភាព​ត្រួតពិនិត្យ​នោះ មន្ត្រី​ជំនាញ​បាន រក​ឃើញ សាច់​មាន់ ភ្លៅ​មាន់ មាន់​មូល ដំឡូងបារាំង​ចិត​រួច​សរុប ចំនួន​០២​ទូរ​កុង​តៃ​ន័​រ (​ទូរ​ក្លា​សេ​) មាន​ទំងន់​សរុប​៤០​តោន និង​ផលិតផល​ម្ហូបអាហារ​ចំនួន​១៦​មុខ​ទៀត​ប៉ុន្តែ​រក​មិនឃើញ​សារធាតុ​គីមី​ហាមឃាត់​នោះ​ទេ ។

យ៉ាងណា​ទំនិញ​ទាំង​អស់នោះ​ពុំ​មាន​ឯកសារ​ត្រឹមត្រូវ បន្ទាប់​មក គណៈកម្មការ​ចម្រុះ សម្រេច​បិទ​ឃ្លុំបេ​ទូរ​ក្លា​សេ​សាច់​មាន់​ទាំង​០២​ទូរ​សិន ហើយ​បានឱ្យ​ម្ចាស់​សិប្បកម្ម​ធ្វើ​កិច្ចសន្យា​កែតម្រូវ​ឱ្យ​បាន​ត្រឹមត្រូវ​ឡើង​វិញ ពុំនោះ​ទេ​នឹង​ត្រូវ​ប្រឈម​នឹង​ការ​បិទ​អាជីវកម្ម​ជា​បណ្តោះអាសន្ន​តែ​ម្ដង ៕