ប៉ូលិសថៃ បានចាប់ខ្លួនជនជាតិខ្មែរឥស្លាម ចំនួន៣៤នាក់ ដោយបដិសេធសំណើធ្វើដំណើររបស់ពួកគេទៅធ្វើការនៅភាគខាងត្បូងប្រទេសថៃ ដោយសារ មិនបំពេញលក្ខខណ្ឌអន្តោប្រវេសន៍គ្រប់គ្រាន់ ។
នេះបើតាមការផ្សាយរបស់កាសែត បាងកកប៉ុស្ត៍ នៅព្រឹកថ្ងែទី២២ កុម្ភៈ ២០១៩ នេះថា ខ្មែរឥស្លាម ទាំង៣៤នាក់មានស្ត្រី២នាក់ ត្រូវបានប៉ូលិសថៃបញ្ជូនអោយវិលមកកាន់កម្ពុជាវិញ តាមច្រកផ្លូវអន្តរជាតិ ក្រុងប៉ោយប៉ែត បន្ទាប់ពីពួកគេត្រូវបានឃាត់ខ្លួននៅក្នុងខេត្តសាកែវ ប្រទេសថៃ ។
មន្ត្រីអន្តោប្រវេសន៍ថៃ បាននិយាយថា ជនចំណាកស្រុកទាំងនេះ ត្រូវបានឃុំខ្លួនទុកបណ្តោះអាសន្នមួយរយៈពេលខ្លី បន្ទាប់មកថៃបានស្នើសុំអាជ្ញាធរកម្ពុជាឲ្យពួកគេត្រឡប់មកវិញ ។ ពួកគេទាំងអស់បានធ្វើដំណើរតាមទិដ្ឋាកាទេសចរណ៍ ក្នុងចំណោមពួកគេ មានភាគច្រើនបាននិយាយថា ពួកខ្លួនមានបំណងទៅធ្វើការនៅបណ្តាខេត្តនៅភាគខាងត្បូងថៃ ។ ខ្លះទៀតអះអាងថា ពួកគេគ្រាន់តែឆ្លងកាត់ថែ ដើម្បីបន្តទៅធ្វើការនៅម៉ាឡេស៊ី ដោយត្រូវឆ្លងកាត់ច្រកព្រំដែន នៅខេត្តណារ៉ាតធីវ៉ាត ៕
