រាជធានីភ្នំពេញ ៖ ម្ចាស់ផ្ទះ និងម្ចាស់ក្រុមហ៊ុនមួយចំនួន យករថយន្ត និងម៉ូតូ មកចតពីលើចិញ្ចើមទាំងសងខាង នៃមហាវិថីព្រះនរោត្តម ចាប់ពីស្ពាននាគ រហូតដល់វិមានឯករាជ្យ ដែលរដ្ឋបាលរាជធានីបានរៀបការ៉ូឡារួចទុកឲ្យថ្មើរជើងដើរនោះ ត្រូវបានអាជ្ញាធរ ខណ្ឌដូនពេញ ចេញសេចក្តីជូនដំណឹង មិនឲ្យមានការចតយាន្តយន្ដ នៅលើចិញ្ចើមផ្លូវថ្មើរជើងនេះតទៅទៀតឡើយ ។
នៅព្រឹកថ្ងៃទី១៩ ខែកុម្ភៈ ឆ្នាំ២០១៩នេះ លោក សុខ ពេញវុធ អភិបាលខណ្ឌដូនពេញ បានបញ្ជាឲ្យលោក យស យុទ្ធី អភិបាលរងខណ្ឌ, លោក អែម សម្បត្តិ ប្រធានការិយាល័យសណ្ដាប់ធ្នាប់រាជធានីភ្នំពេញ និងលោក គឹម វុត្ថា ប្រធានប្រជាការពារខណ្ឌ សហការចុះដឹកនាំកម្លាំងគណៈបញ្ជាការឯកភាពខណ្ឌ ជាមួយការិយាល័យសណ្ដាប់ធ្នាប់ នៃស្នងការដ្ឋាននគរបាលរាជធានីភ្នំពេញ ធ្វើការរៀបចំសណ្ដាប់ធ្នាប់ តាមបណ្តោយផ្លូវនេះ ។
លោក សុខ ពេញវុធ បានអោយដឹងថា ការហាមឃាត់ យានយន្ដគ្រប់ប្រភេទ មិនឲ្យមានការឈប់ចត នៅលើចិញ្ចើមផ្លូវថ្មើជើង និងការ៉ូឡាទាំងសងខាងផ្លូវ ខាងលើនេះ ដើម្បីសម្រួល ដល់ការធ្វើដំណើររបស់ប្រជាពលរដ្ឋ ភ្ញៀវទេសចរ និងជាផ្លូវសម្រាប់ជនពិការ ។ រដ្ឋបាលខណ្ឌ សង្ឃឹមថា បងប្អូនប្រជាពលរដ្ឋ គ្រឹះស្ថាន ស្ថាប័នពាក់ព័ន្ធ អាជីវករលក់រថយន្ត ក្រុមហ៊ុនឯកជន ចូលរួមអនុវត្តតាមការណែនាំខាងលើ ជាពិសេសដើម្បីចូលរួមចំណែកធ្វើ ឲ្យដងផ្លូវសាធារណៈ មានសោភ័ណភាព សណ្តាប់ធ្នាប់ និងរបៀបរៀបរយល្អប្រសើរថែមទៀត ។
សូមជម្រាបថា ដើម្បីលើកកំពស់សោភ័ណ្ឌភាព និងដើម្បីរៀបចំសណ្តាប់ធ្នាប់សម្រាប់អ្នកថ្មើរជើងឲ្យបានល្អប្រសើរ រដ្ឋបាលរាជធានីភ្នំពេញ បានរៀបចំការ៉ូឡាថ្មី នៅចិញ្ចើមមហាវិថី ព្រះនរោត្តម ចាប់ពីរមណីយដ្ឋានវត្តភ្នំ ដល់វិមានឯករាជ្យ ហើយគម្រោងនេះ ក៏មានការរៀបចំតម្រាយផ្លូវសម្រាប់ជនពិការផង ។ ប៉ុន្តែក្រោយការស្ថាបនារួចហាក់មិនមានអ្វីប្រសើរឡើងនោះទេ នោះក៏ដោយសារប្រជាពលរដ្ឋមួយចំនួន និងក្រុមហ៊ុនមួយចំនួន ក៏ដូចជា មន្ត្រីរាជការផងដែរ មិនបានចូលរួមសហការជាមួយរដ្ឋបាលរាជធានីភ្នំពេញ ដោយបានយករថយន្តទៅចតពាស់ពេញ ការ៉ូឡាថ្មី និងចិញ្ចើមផ្លូវទាំងនេះ ៕