រាជធានីភ្នំពេញ ៖ នេះចាត់ទុកជាដំណឹងមួយដ៏ក្រៀមក្រំសម្រាប់ប្រទេសកម្ពុជា អ្នកចម្រៀងអាយ៉ៃឆ្លើយឆ្លង លោកតា ផ្លុង មឿក បានទទួលមរណភាពហើយនៅម៉ោង៨ព្រឹក ថ្ងៃទី១៥ ខែកុម្ភៈ ឆ្នាំ២០១៩ ក្នុងជន្មាយុ៨៦ឆ្នាំ ក្រោយពីបានធ្លាក់ខ្លួនឈឺជាច្រើនឆ្នាំ លោកតាដេកលើកន្ទ្រេលក្នុងស្ថានភាពភ្លេចភ្លាំង ដោយស្បែកដណ្តប់ឆ្អឹង រហូតដល់ថ្នាក់វង្វេងលែងស្គាល់អ្នកណាទាំងអស់ ។
នេះបើយោងតាមកូនប្រុសរបស់លោកតាផ្លុង មឿក ឈ្មោះផ្លុង រស្មី ដែលបានបង្ហោះដំណឹងក៏ក្រៀមក្រំនេះលើហ្វេសប៊ុករបស់លោកថា «លោកពុក ផ្លុង មឿក បានទទួលមរណះភាពហើយគាត់លាពីពួកយើងរហូតហើយបងប្អូនដ៏សែនកំសត់ទាំងអស់គ្នាអើយ!» ។
សពរបស់លោកតា ផ្លុង មឿក ត្រូវបានក្រុមគ្រួសារយកទៅពីមន្ទីរពេទ្យព្រះកេតុមាលា ទៅរៀបចំពិធីបុណ្យតាមប្រពៃណី នៅវត្តស្វាយពពែរ ស្ថិតតាមបណ្ដោយមហាវិថី សម្ដេចព្រះសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ៕
