ខេត្តកណ្តាល ៖ មន្ត្រីយោធាម្នាក់ ត្រូវសមត្ថកិច្ច ចាប់ឃាត់ខ្លួន ដកហូតបាន កាំភ្លើងខ្លី និងវត្ថុតាង មួយចំនួនទៀត ទាក់ទិនករណី គ្រឿងញៀន កាលពីវេលាម៉ោង ៨និង១០នាទីយប់ថ្ងៃទី១១ ខែកុម្ភៈ ឆ្នាំ២០១៩ នៅចំណុច ភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ។
សមត្ថកិច្ចនគរបាលស្រុកអង្គស្នួល បានឲ្យដឹងថា ជនសង្ស័យឈ្មោះ សូរិទ្ធី សត្យា ភេទប្រុស អាយុ៣៧ឆ្នាំ ជនជាតិខ្មែរ មុខរបរជាយោធា មានទីលំនៅ ភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ជាមុខសញ្ញា ជួញដូរគ្រឿងញៀន ។
កម្លាំងសមត្ថកិច្ចចម្រុះខេត្តកណ្ដាល សហការជាមួយកម្លាំងមន្ទីរប្រឆាំងគ្រឿងញៀន បើកប្រតិបត្តិការធ្វើការស្រាវជ្រាវ រហូតដល់ឃាត់ខ្លួន ដោយមានការសម្របសម្រួលនីតិវិធី ដោយលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល រួមជាមួយកម្លាំងជំនាញផ្នែកប្រឆាំងគ្រឿងញៀនស្រុកអង្គស្នួល បានចូលរួមសហការនឹងមន្ទីរប្រឆាំងគ្រឿងញៀន ធ្វើការចាប់ឃាត់ខ្លួនមុខសញ្ញាជួញដូរគ្រឿងញៀន ជាមន្ត្រីយោធានេះ ។
ក្នុងពេលបង្ក្រាប និងឃាត់ខ្លួននោះ ជនសង្ស័យរូបនេះ មានកាំភ្លើងខ្លីបម្រុងបាញ់មកលើកម្លាំងសមត្ថកិច្ច តែសមត្ថកិច្ចក្របួចទាន់ និងបានរឹបអូសយកវត្ថុតាង រួមមាន ម្សៅក្រាម ពណ៌សថ្លា សង្ស័យថា សារធាតុញៀន ចំនួន២កញ្ចប់ ទូរសព្ទដៃ១គ្រឿង កាំភ្លើងខ្លី ១ដើម ម៉ាកឡុករបស់ចិន បង់២ និងគ្រាប់ មួយគ្រាប់ ។
ក្រោយមកបានឆែកឆេរក្នុងផ្ទះដកហូតបានបង់កាំភ្លើងវែងប្រភេទ អឹមសី១ដើម និងគ្រាប់ មួយចំនួន រថយន្ត១គ្រឿង ត្រូវបានបញ្ជូនទៅ មន្ទីរប្រឆាំងគ្រឿងញៀនក្រសួងមហាផ្ទៃ ដើម្បីបន្តនីតិវិធី ៕