ភ្នំពេញ ៖ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានសម្រេចបង្កើតក្រុមអន្តរាគមន៍ពិសេស សម្រាប់ដោះស្រាយបញ្ហាកកស្ទះចរាចរណ៍ ចំនួន៣ក្រុម ដោយមានការឯកភាពពីគណៈបញ្ជាការឯកភាពសាលារាជធានីភ្នំពេញ ។
យោងតាមការលើកឡើង នៅក្នុងហ្វេសប៊ុកផ្ទាល់របស់ឧត្ដមសេនីយ៍ឯក ស ថេត នៅថ្ងៃទី១១ ខែកុម្ភៈ ឆ្នាំ២០១៩នេះ មានដូចជា ៖
– ក្រុមនេះ នឹងចល័តទៅគ្រប់គោលដៅ ដែលមានការកកស្ទះខ្លាំងរៀងរាល់ថ្ងៃ ។
– ទប់ស្កាត់ការជិះបញ្ច្រាស នៅម៉ោងកកស្ទះ ។
– សុំអោយកម្លាំងសម្រួលចរាចរណ៍ ពេលស្ទះខ្លាំង អោយបានធូរស្បើយ មិនត្រូវឈរលើថ្នល់មើលការកកស្ទះឡើយ ។
– ត្រូវជិះម៉ូតូចល័ត ទៅគ្រប់កន្លែងដែលស្ទះ ហើយសម្រួលដោះស្រាយបញ្ហាស្ទះភ្លាមៗ ។
– ត្រូវត្រៀមខ្លួនជានិច្ច នៅតាមច្រកចេញរាជធានីភ្នំពេញ នៅពេលមានពិធីបុណ្យជាតិសំខាន់ៗ ។
– ត្រូវលុបបំបាត់សកម្មភាពពួនស្ទាក់ ដើម្បីចាប់អ្នកប្រព្រឹត្តិបទល្មើសចរាចរណ៍ ។
– នឹងមានបំប៉នវគ្គសិក្សាដល់មន្ត្រីនគរបាលចរាចរណ៍ ។
– មិនត្រូវពិន័យលើសការកំណត់ ។
– មិនត្រូវឆ្លើយដាក់កូនចៅពេលមានបញ្ហា ។
– ត្រូវកែជាបន្ទាន់ នៅពេលពលរដ្ឋបត់ស្តាំ ទោះស្តុបឡើងពណ៍ក្រហមក៏ដោយ មិនត្រូវពិន័យឡើយ ៕
