ព្រៃវែង៖ នាព្រឹកថ្ងៃទី១១ ខែកុម្ភៈ ឆ្នាំ២០១៩នេះ លោកឧត្តមសេនីយ៍ ព្រុំ សន្ធរ ស្នងការ នគរបាលខេត្ត បានដាស់តឿនក្រើនរំឭក ដល់កងកម្លាំងនគរបាលទូទាំងខេត្តព្រៃវែង ទាំងមូលឲ្យប្រកាន់ខ្ជាប់នូវ ក្រមសីលធម៌ សុជីវធម៌ និងសេចក្តីថ្លៃថ្នូ គោរពវិន័យ ជាកងកម្លាំងនគរបាលជាតិ។
លោកឧត្តមសេនីយ៍ ស្នងការ បានស្នើដល់មន្ត្រីនគរបាលជំនាញ និងសមត្ថកិច្ច ពាក់ព័ន្ធ ដែលចំណុះ ស្នងការដ្ឋាននគរបាលខេត្តព្រៃវែង ត្រូវបំពេញការងារ ផ្តល់សេវាសាធារណៈ ជូនប្រជាពលរដ្ឋឱ្យបានត្រឹមត្រូវ។ មន្ដ្រីនគរបាលប៉ុស្តិ៍រដ្ឋបាល គ្រប់ឃុំ ត្រូវឧស្សាហ៍ចុះ មូលដ្ឋាន ជួបប្រជាពលរដ្ឋ ដល់ខ្នងផ្ទះ សួរនាំពួកគាត់ រកពីបញ្ហាប្រឈមនិងកង្វល់ក្នុងចិត្ដរបស់ពួកគាត់។ ក្នុងករណីពួកគាត់មានបញ្ហា ប្រឈមឬកង្វល់អ្វីមួយត្រូវប្រញ៉ាប់ដោះស្រាយជូនពួកគាត់តាមលទ្ធភាពដែលខ្លួនមាន។
ប្រសិនបើបងប្អូនប្រជាពលរដ្ឋក្នុងមូលដ្ឋានមិនទាន់មាន ឯកសារប្រើប្រាស់ដូចជា៖ សៀវភៅគ្រួសារ សៀវភៅស្នាក់នៅ អត្ដសញ្ញាណប័ណ្ណ ។ល។ នគរបាលត្រូវប្រញ៉ាប់ បំពេញឯកសារធ្វើជូនពួកគាត់ ។
លោកឧត្តមសេនីយ៍ ស្នងការ នគរបាលខេត្តបានបន្តថាៈ ពេលដែលប្រជាពលរដ្ឋ ក្នុងមូលដ្ឋានមានទំនុកចិត្ដមកលើនគរបាលរឿងអ្វីក៏ពួកគាត់ហ៊ានរាយការណ៍ដែរ។ រាល់ព័ត៌មានពីប្រជាពលរដ្ឋបង្កលក្ខណៈងាយស្រួលដល់នគរបាលក្នុងការក្ដាប់សភាពការណ៍បទល្មើស និងមុខសញ្ញាផ្សេងៗ ក្នុងមូលដ្ឋាន។
លោកឧត្តមសេនីយ៍ ស្នងការ ក៏បានជំរុញដល់អស់លោកជានាយ-នាយរងអធិការ និងនាយប៉ុស្ដិ៍យកចិត្ដទុកដាក់ខិតខំប្រឹងប្រែងបន្ដពង្រឹងការងារប្រចាំបញ្ជា ព្រមទាំង ពង្រឹងស្មារតីកងកម្លាំង ប្រមូលផ្ដុំធ្វើការបំប៉នហ្វឹកហាត់ រំលឹកមេរៀន បច្ចេកទេស ក្នុងការធានាសណ្ដាប់ធ្នាប់សង្គម និងឧបត្ថម្ភគាំទ្រការហូបចុក ស្នាក់នៅឲ្យបាន សមរម្យដល់កងកម្លាំង ៕
សហការី KBN