តារាចម្រៀងប្រុសវ័យក្មេងឈ្មោះ ថេណា ដែលជាតារាចម្រៀង Original Song ហើយមានបងប្អូនជាច្រើនបានស្គាល់តាមរយៈបទល្បីៗជាច្រើនរបស់ថេណា ដូចជា «លួចស្នេហ៍ដួងច័ន្ទ, ខុសជំនាន់» ជាដើមនោះ ស្រាប់តែកាលពីយប់មិញនេះ លោកបានបញ្ចេញចំរៀងបែបរ៉េបមួយបទ មានចំណងជើងថា “អេម” ដែលធ្វើឲ្យប្រិយមិត្តស្តាប់ហើយក្តៅខ្លួន ឯចំណែកអ្នកខ្លះទៀតស្ទើរតែឈាមច្រមុះទៅហើយ រហូតរវើរវាយក៏មាន ។
យ៉ាងណាមិញ សម្រាប់បទថ្មីរបស់ ថេណា មួយបទនេះ បានធ្វើឲ្យអ្នកគាំទ្ររបស់លោក ក៏ដូចអ្នកនិយមលេងនៅលើបណ្តាញសង្គមហ្វេសប៊ុក មិនពេញចិត្ត និងមានការរិះគន់ ព្រោះថា អត្ថន័យនៃបទចម្រៀង បែបអាសអាភាស ដល់ថ្នាក់បទនេះ ដាក់អក្សរ (១៨+) ជាសម្គាល់ ឫហាមមិនឲ្យក្មេងៗក្រោយអាយុ១៨ឆ្នាំ ស្តាប់ថែមទៀតផង ។
នៅថ្ងៃទី១១ ខែកុម្ភៈ ឆ្នាំ២០១៩នេះ លោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានចេញមុខព្រលះលោក ថេណា ដែលជាតារាចម្រៀង Original Song ថា ជាមនុស្សកំពុងបន្ថោកខ្លួនឲ្យក្លាយជាអ្នកបំពុលសង្គម និងបំផ្លាញខ្លួនក្នុងវិស័យវប្បធម៌ជាតិខ្មែរទៅវិញ។
តាមរយៈហ្វេសប៊ុកផ្លូវការរបស់ខ្លួន លោក ថៃ នរៈសត្យា បានបញ្ជាក់យ៉ាងដូច្នេះថា «ទស្សនៈយ៉ាងម៉េចហ្នឹង ដែលអាចបង្កើតគំនិតផលិតស្នាដៃរបៀបនេះ ? ជាអ្នកនិពន្ធ ជាអ្នកចម្រៀង ជាអ្នកសិល្បៈ ជាសាធារណៈបុគ្គល គួរតែជាគម្រូល្អជាសាធារណៈជាពិសេស ចំពោះប្អូនៗយើងជំនាន់ក្រោយ! តែនេះមិនអ៊ីចឹងទេ បែរជាបន្ទាបបន្ថោកខ្លួនឲ្យក្លាយជាអ្នកបំពុល និងបំផ្លាញខ្លួនក្នុងវិស័យវប្បធម៌របស់ជាតិខ្លួនទៅវិញ។ មិនយល់ សង្ឃឹមមានអ្នកគាំទ្រភាពលីលានេះបានប៉ុន្មាននាក់ទៅហ្នឹង ? បើគ្រាន់តែងើបក្បាលមកត្រូវមហាជនសំពងយ៉ាងតំណំទៅហើយនោះ! យករឿងដាក់ខ្លួនមែន»។
ក្រៅពីលោក ថៃ នរៈសត្យា ក៏គេសង្កេតឃើញថា មានយុវជនខ្មែរយ៉ាងច្រើន បានចេញមុខរិះគន់យ៉ាងចាស់ដៃ ចំពោះបទចម្រៀងរបស់លោ ថេណា។ ជាមួយគ្នានេះ មានអ្នកប្រើប្រាស់ហ្វេសប៊ុក ខ្លះទៀតបានសំណូមពរឲ្យស្ថាប័នមានសមត្ថកិច្ច ជួយចាត់ការតាមនីតិវិធីចំពោះលោក ថេណា ផងដែរ។
ចង់ដឹងថា អត្ថន័យបទថ្មីរបស់ ថេណា ស្តាប់ហើយក្តៅខ្លួនប៉ុណ្ណា ចូរមើលវីដេអូខាងក្រោមនេះទាំងអស់គ្នា!