ថៃ ៖ នៅទីបំផុត រដ្ឋាភិបាលបានសុំទោសប្រជាពលរដ្ឋទីក្រុងបាងកក អំពីការបំពុលបរិយាកាស ដែលបន្ដរំខានជីវិតរស់នៅប្រចាំថ្ងៃរបស់ពួកគេ និងកំពុងគំរាមកំហែងដល់សុខភាពរបស់ពួកគេ នាពេលនេះផងដែរ ។
បរិមាណបំណែកធូលីតូចល្អិតដែលអាចបង្កគ្រោះថ្នាក់នៅក្នុងអាកាសពណ៌ប្រផេះ បាននិងកំពុងគ្របដណ្ដប់លើទីក្រុងបាងកក និងខេត្តជាប់ៗគ្នាស្ទើរតែរាល់ថ្ងៃ ចាប់តាំងពីចុងខែធ្នូមក ដែលអាចមានឥទ្ធិពលយូរអង្វែងលើសុខភាពមនុស្ស និងសត្វ ជាហេតុធ្វើអោយប្រជាពលរដ្ឋថៃខឹងសម្បារ និងត្អូញត្អែរអំពីបញ្ហាលំបាកក្នុងការដកដង្ហើម និងជំរុញអោយរដ្ឋាភិបាលធ្វើការដោះស្រាយបញ្ហាឱ្យបានច្បាស់លាស់ ។
លោកនាយករដ្ឋមន្ត្រីថៃ ប្រាយុទ្ធ ចាន់អូចា បាននិយាយនៅក្នុងសេចក្តីថ្លែងការណ៍មួយ កាលពីថ្ងៃទី០១ ខែកុម្ភៈ ឆ្នាំ២០១៩នេះថា «រដ្ឋាភិបាលសូមទោសចំពោះភាពរអាក់រអួលដែលបណ្តាលឱ្យមានបញ្ហាលំបាកទាំងនេះ ហើយសូមអរគុណគ្រប់គ្នា ចំពោះការជួយគាំទ្រ និងមានកិច្ចសហប្រតិបត្តិការ» ។
លោកប្រាយុទ្ធ ក៏បានស្តីបន្ទោស និងអំពាវនាវផងដែរ ដល់ម្ចាស់យានយន្តគ្រប់ប្រភេទប្រើប្រេងម៉ាស៊ូត ត្រូវកាត់បន្ថយ ពោលគឺត្រូវប្រើប្រាស់រថយន្តរបស់ពួកគេ នៅលើមហាវិថីក្នុងក្រុងបាងកក នៅពេលដែលចាំបាច់ តែប៉ុណ្ណោះ ។
លោកបញ្ជាក់យ៉ាងដូច្នេះថា “ប្រសិនបើអាចធ្វើទៅបាន ចូរជៀសវាង លែងប្រើយានយន្តដែលចាក់ប្រេងម៉ាស៊ូតទាំងអស់នោះ រហូតទាល់តែអ័ព្ទ បានធូរស្រាល” ។
ចំពោះមូលហេតុចម្បងនៃអ័ព្ទ ដោយសារតែយានយន្តប្រើប្រេងម៉ាស៊ូតនេះ លោកប្រាយុទ្ធ បានណែនាំថា “ដើម្បីជាដំណោះស្រាយយូរអង្វែង យើងនឹងធ្វើឱ្យប្រសើរឡើង នូវប្រព័ន្ធដឹកជញ្ជូនសាធារណៈ ដែលមានរួមបញ្ចូលស្តង់ដារប្រេង និងម៉ាស៊ីនស្តុកផ្សែង ។ យើងនឹងមានស្ថានីយ៍ប្រេងឥន្ធនៈជាច្រើន ដែលផ្តល់ជូននូវជម្រើសបរិស្ថាន និងចាប់ផ្តើមការលើកកម្ពស់រថយន្តបរិស្ថាន ឬរថយន្តអគ្គីសនី» ។
ទោះជាយ៉ាងណា រដ្ឋបាលក្រុងបាងកក និងអាជ្ញាធរពាក់ព័ន្ធនានា បានចាត់វិធានការមួយចំនួនរួចទៅហើយ ដើម្បីបន្ធូរបន្ថយ បញ្ហានៅតំបន់ដែលមានផ្សែងអ័ព្ទខ្លាំង ។ មានក្រុមមន្ត្រី បានចាប់ផ្តើមធ្វើការឃ្លាំមើលយ៉ាងដិតដល់លើរោងចក្រឧស្សាហកម្ម ដោយធានាថា គ្មានផ្សែងពុលចេញពីបំពង់ផ្សែងរបស់ពួកគេទេ ។ ផ្លូវថ្នល់ ត្រូវបានគ្រប់គ្រង និងហាមប្រាមជាទៀងទាត់ ។ អាជ្ញាធរក្រុងបាងកកចេញបទបញ្ជាបិទសាលារៀន៤៣៧ កន្លែង កាលពីថ្ងៃពុធ និងគ្រោងបិទបន្តដល់សាលាឯកជន វិធានការនេះនឹងមិនមានរថយន្តសាលាធ្វើដំណើរតាមផ្លូវទេ ។ ហើយថែមទាំងបានស្នើសុំឲ្យប្រជាជនកុំអុជធូប និងក្រដាសអំឡុងពិធីបុណ្យចូលឆ្នាំចិន ថែមទៀតផង ។ ចេញទៅណាមកណា តម្រូវឲ្យប្រជាពលរដ្ឋត្រូវពាក់ម៉ាស ។
ទន្ទឹមនឹងនេះដែរ ប្រតិបត្តិការបាញ់ទឹកប្រយុទ្ធប្រឆាំងនឹងផ្សែងអ័ព្ទ បានបន្តធ្វើជាច្រើនកន្លែង ក្នុងទីក្រុងបាងកក ។ មានទាំង យន្តហោះគ្មានមនុស្សបើក និងម៉ាស៊ីនបាញ់ទឹក(រ៉ូប៉ូត) និងភ្នាក់ងារអង្គភាពពន្លត់អគ្គីភ័យ ។ ទឹកក៏កំពុង ត្រូវបាញ់ពីលើដំបូលនៃអគារខ្ពស់ៗ ក្នុងក្រុងបាងកក ។ យន្តហោះគ្មានមនុស្សបើក ដែលអាចគ្របដណ្តប់ ផ្ទៃដីប្រមាណ ០,១៦ហិកតា ក្នុងប្រតិបត្តិការបាញ់ទឹកមួយជើង ។
ឧត្ដមសេនីយ៍ឯកកងទ័ពថៃមួយរូប បាននិយាយថា កងកម្លាំងរបស់លោក កំពុងធ្វើយ៉ាងសកម្ម ទៅនឹងគោលនយោបាយរបស់រដ្ឋាភិបាល ស្តីពីការប្រយុទ្ធប្រឆាំង នឹងការបំពុលបរិស្ថានផងដែរ ។ លោកថា «ប្រជាជនថៃគ្រប់រូបក៏គួរចូលរួមជួយផងដែរ, កុំបន្ទោសរដ្ឋាភិបាល, វាជាកាតព្វកិច្ចរបស់មនុស្សគ្រប់គ្នា» ៕
ប្រភពពី The Nation
