ទីក្រុងបាងកក កំពុងតែរួមរឹតខ្លាំងទៅដោយខ្យល់ពុល បានបង្ខំឲ្យ ចៅហ្វាយក្រុងចេញបទបញ្ជាមិនធ្លាប់មានពីមុនមក ដើម្បីបិទសាលារៀនជិត៤៥០កន្លែង កាលពីថ្ងៃពុធ អាចនឹងជួយឲ្យចរាចរណ៍ក្នុងទីក្រុងមានភាពធូរស្រាល និងអាចជួយកាត់បន្ថយការបញ្ចេញឧស្ម័នពុលមួយចំណែក ។
ក្នុងពេលឆាប់ៗនេះ សាលាក្រុងបាងកក អាចនឹងចេញសេចក្តីជូនដំណឹងដល់ប្រជាពលរដ្ឋ កុំឲ្យចេញទៅហាត់ប្រាណ នៅតាមសួនច្បារសាធារណៈទៀតផង ។ អាជ្ញាធរថៃ ក៏គ្រោងនឹងស្នើឲ្យសាលាឯកជនមួយចំនួនទៀត បិទទ្វារមួយរយៈពេលផងដែរ។ ជាមួយគ្នានេះ រដ្ឋាភិបាលក៏បានស្នើសុំឲ្យពលរដ្ឋថៃ កុំដុតធូប និងក្រដាសសែន ក្នុងអំឡុងពេលបុណ្យចូលឆ្នាំចិន ខាងមុខនេះ ។
នៅពេលដែលត្រូវធ្វើដំណើរ ទៅធ្វើការ ឬត្រូវចេញទៅក្រៅផ្ទះនោះ ប្រជាជនថៃ ត្រូវពាក់ម៉ាសការពារ ។រហូតមកដល់ពេលនេះ ម៉ាសការពារ ការបំពុលបរិស្ថានបានលក់អស់នៅក្នុងហាងជាច្រើន នាទីក្រុងបាងកក ។
តម្លៃលក់ដុំ គេលក់ប្រហែល ៩៥បាត ក្នុងមួយដុំ ឫតម្លៃ ៦៥០បាត ក្នុងមួយប្រអប់ (២០ដុំ) ។ យ៉ាងណាតម្លៃលក់រាយម៉ាសមួយសន្លឹកនៅមិនទាន់ដឹងលក់ប៉ុន្មានបាតនៅឡើយទេ ។
បើតាមស្ថានឯកអគ្គរាជទូតកម្ពុជាប្រចាំប្រទេសថៃ អំពាវនាវដល់ប្រជាពលរដ្ឋកម្ពុជាទាំងអស់ ដែលរស់នៅប្រទេសថៃឲ្យ មានការប្រុងប្រយ័ត្នចំពោះខ្យល់កខ្វក់ដែលគ្របដណ្ដប់ពេញប្រទេសថៃ ។
ពេលបងប្អូនដែលកំពុងស្នាក់នៅ និងធ្វើការ នៅក្នុងតំបន់ដែលមានបញ្ហានេះ មេត្តាប្រុងប្រយ័ត្ន និងការពារតាមការណែនាំរបស់អាជ្ញារធរថៃ មេត្តាថែរក្សាសុខភាពឱ្យបានល្អ គឺត្រូវពាក់ម៉ាសការពារប្រភេទ N95 នៅពេលដែលធ្វើដំណើរ ឬធ្វើការនៅទីវាល ជាពិសេសបងប្អូនពលករខ្មែរដែលធ្វើការ នៅទីក្រុងបាងកក និងតាមបណ្តាខេត្តរងឥទ្ធិពល ។
ម៉ាសរបាំងមុខការពារធូលី ប្រភេទ N95 ដែលបាននាំចូលតាមរយៈក្រុមហ៊ុនមួយ មានការត្រួតពិនិត្យស្តង់ដារត្រឹមត្រូវ ពីរដ្ឋបាលចំណីអាហារនិងឪសថអាមេរិក ផងដែរ ។
