ភ្នំពេញ ៖ នៅក្នុងកិច្ចប្រជុំដែលប្រព្រឹត្តទៅនៅថ្ងៃទី៣០ មករា ២០១៩ នេះលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ការចុះបញ្ជីរថយន្តចង្កូតស្តាំ លែងអនុញ្ញាតឲ្យមានទៀតហើយ ។ ការបិទបញ្ចប់ ការចុះបញ្ជីរថយន្តចង្កូតស្តាំនេះ ដោយគ្មានលក្ខខណ្ឌ ដើម្បីកាត់បន្ថយគ្រោះថ្នាក់ចរាចរណ៍ឲ្យបានកម្រិតខ្ពស់ ។
លោកទេសរដ្ឋមន្ត្រី បានគូសបញ្ជាក់យ៉ាងដូច្នេះ «ជាមួយយន្តការរដ្ឋបាល និងបច្ចេកវិទ្យាថ្មី ការចុះបញ្ជីរថយន្តចង្កូតស្ដាំ ត្រូវតែបញ្ឈប់ទាំងស្រុង ចាប់ពីពេលនេះតទៅ ដោយគ្មានលក្ខខណ្ឌ ដើម្បីកាត់បន្ថយគ្រោះថ្នាក់ចរាចរណ៍ឱ្យនៅកម្រិតអប្បបរិមា ស្របតាមប្រសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍» ។
ដូច្នេះ ការបិទបញ្ចប់ការចុះបញ្ជីរថយន្តចង្កូតស្តាំ តាមគោលការណ៍របស់លោកទេសរដ្ឋមន្ត្រី ស៊ុន ចាន់ថុល គឺជាយន្តការមួយប្រយុទ្ធប្រឆាំង នឹងក្រុមជនខិលខូច ពិសេសមន្ត្រីមួយចំនួន ដែលនៅតែបន្តអនុញ្ញាតឲ្យគេលួចនាំយករថយន្តចង្កូតស្តាំចូលក្នុងប្រទេសកម្ពុជា បន្តបន្ទាប់ ។
គេនៅចាំបានថា កាលពីថ្ងៃទី០៥ ខែមករា ឆ្នាំ២០១៦ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចឲ្យប្រជាពលរដ្ឋប្រើរថយន្តចង្កូតស្តាំទាំងអស់ ចូលទៅធ្វើស្លាកលេខ និងបង់ពន្ធទៅតាមការកំណត់ ហើយអនុគ្រោះដល់ពួកគេមិនឲ្យកែចង្កូតថែមទៀតផង ។ ទន្ទឹមគ្នានោះសម្តេចតេជោ ហ៊ុន សែន ក៏បានហាមមិនឲ្យមានការនាំចូលរថយន្តចង្កូតស្តាំ ទៀតនោះឡើយ ។
ទោះជាយ៉ាងណា គេនៅតែឃើញវត្តមានរថយន្តចង្កូតស្តាំ មានក្នុងប្រទេសកម្ពុជា ពោលគឺរថយន្តស៊េរីទំនើប ឆ្នាំខ្ពស់ៗតែម្តង ដោយសារក្រុមឈ្មួញឱកាសនិយម បន្លំត្រីងៀតឆ្លៀតពង ទំនងមានការឃុបឃិតប្រព្រឹត្តអំពើពុករលួយ ជាមួយមន្ត្រីខិលខូច លួចលាក់អោយចូលបន្ថែមទៀត ចែកលុយគ្នាធ្វើមាន ធ្វើបាន ។
អ្នកដែលកំពុងប្រើប្រាស់រថយន្តចង្កូតស្តាំដេកក៍មិនលក់ បក់ក៍មិនល្ហើយ ព្រោះខំចំណាយលុយខ្ទង់ម៉ឺនដុល្លារ ទិញឡានចង្កូតស្តាំជិះព្រោះវាធូរថ្លៃ តែឥឡូវត្រូវក្រសួងប្រកាសបិទបញ្ឈប់ទាំងស្រុង ចុះបញ្ជីរថយន្តចង្កូតស្ដាំ ចាប់ពីពេលនេះតទៅ ។
ដោយឡែកកាលពីពេលថ្មីៗនេះ សាខាគយ និងរដ្ឋាកររាជធានីភ្នំពេញ បានចុះឃាត់រថយន្តទំនើបចង្កូតស្តាំ គ្មានពន្ធ២គ្រឿង ម៉ាក Toyota Vellefire ឆ្នាំ២០១៥ និងឆ្នាំ២០១៧ នៅភូមិសាស្ត្រ ខណ្ឌសែនសុខ រាជធានីភ្នំពេញ ។ រថយន្តទំនើបចង្កូតស្តាំ បន្លំពន្ធទាំងអស់នេះ ត្រូវដកហូតទុកជាសម្បត្តិរដ្ឋ ដោយមិនមានការដោះស្រាយបង់ជាប្រាក់ពិន័យ ហើយឲ្យម្ចាស់យកទៅវិញឡើយ លទ្ធផលចុងក្រោយអ្នកទិញអាចទឹកភ្នែក ។
ជាមួយគ្នានេះ សាខាគយ និងរដ្ឋាកររាជធានីភ្នំពេញ នឹងបន្តយុទ្ធនាការការងារនៅក្នុងរាជធានីភ្នំពេញ អោយដូចភ្លៀងរលឹម និងកាន់តែខ្លាំងផងដែរ ៕
