មណ្ឌលគិរី ៖ បុរសមន្ត្រីឧទ្យានុរក្សម្នាក់ បានរងរបួសធ្ងន់ធ្ងរ ក្រោយខ្មាន់កាំភ្លើង(មិនស្គាល់មុខ)ក្រុមសត្វព្រៃ បានបាញ់ប្រហារ នៅព្រលឹមថ្ងៃទី២៩ ខែមករា ឆ្នាំ២០១៩ ក្នុងតំបន់ការពារសត្វព្រៃស្រែពក ចំនុចត្រពាំងកកោះ ក្នុងភូមិជីមៀត ឃុំណងឃីណឹង ស្រុកកោះញែក ខេត្តមណ្ឌលគិរី ។
ប្រភពពីមន្ត្រីមន្ទីរបរិស្ថានខេត្ត បានប្រាប់ឲ្យដឹងថា ជនរងគ្រោះឈ្មោះ ចេង ចន្ធី ជាមន្ត្រីឧទ្យានុរក្សនៃមន្ទីរបរិស្ថានខេត្ត រងរបួសដោយសារគ្រាប់កាំភ្លើងទម្លុះចំគូទខាងស្តាំ ។ ក្រោយកើតហេតុភ្លាមៗ មន្ត្រីដែលរងរបួស ត្រូវបានបញ្ជូនមកសង្គ្រោះនៅឯរាជធានីភ្នំពេញ ។
ក្នុងករណីផ្ទុះអាវុធដាក់គ្នាបណ្តាលឲ្យមានមនុស្សរងរបួសខាងលើនេះ មិនមានប្រភពណាមួយ បញ្ជាក់ឲ្យច្បាស់ថា ផ្តើមឡើងដោយរឿងអ្វីខ្លះនោះឡើយទេ ប៉ុន្តែបើតាមមន្ត្រីនៃមន្ទីបរិស្ថានខេត្ត បានឲ្យថា ផ្តើមចេញពីក្រុមអ្នកឆ្លុះសត្វកំពុងធ្វើសកម្មភាពប្រមាញ់សត្វ ពើបប្រទះគ្នាជាមួយមន្ត្រីឧទ្យាននុរក្ស ដែលកំពុងល្បាត ក៏មានការប្រទូសសារ៉ាយនេះកើតឡើងតែម្តង ខណៈស្ថានភាពកាន់តែឡើងកម្តៅ មានគ្រាប់កាំភ្លើងបានហោះត្រូវចំគូថផ្នែកខាងស្ដាំមន្ត្រីបរិស្ថានម្នាក់ បណ្តាលឱ្យដេកដួលតែម្តង ។
ក្រោយកើតហេតុ លោក ស្វាយ សំអ៊ាង អភិបាលខេត្តមណ្ឌលគិរី បានបញ្ជាឲ្យកងកម្លាំងមានសមត្ថកិច្ចគ្រប់អង្គភាព រួមទាំងមន្ត្រីរបស់មន្ទីរបរិស្ថានខេត្ត ឲ្យចុះស្រាវជ្រាវជាបន្ទាន់ រកអ្នកបង្កហេតុ និងធាតុផ្សំរបស់វា ចំពោះករណីផ្ទុះអាវុធរវាងក្រុមអ្នកបរបាញ់សត្វព្រៃ និងមន្ត្រីឧទ្យានុរក្សនៃមន្ទីរបរិស្ថានខេត្តមណ្ឌលគិរីនេះ ដើម្បីឈានទៅរកការឃាត់ខ្លួនចាត់វិធានការណ៍តាមផ្លូវច្បាប់ ៕