សិល្បៈ៖ នាព្រឹកថ្ងៃទី ២៨ ខែមករា នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានចាត់ឱ្យគណៈប្រតិភូដឹកនាំដោយឯកឧត្តមវេជ្ជ អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ ចូលរួមរំលែកទុក្ខដ៏ក្រៀមក្រំជូនចំពោះក្រុមគ្រួសារសពកញ្ញា ខេមរៈ ស្រីពៅ តារាចម្រៀងល្បីមួយរូបនៅកម្ពុជា ដែលកញ្ញាបានទទួលមរណភាពកាលពីថ្ងៃទី២៥ ខែមករា ឆ្នាំ២០១៩ នៅប្រទេសឥណ្ឌា ដោយរោគាពាធ ។ ជាមួយនឹងការរំលែកទុក្ខនេះ កាកបាទក្រហមកម្ពុជា បាននាំយកនូវ អង្ករ មី ត្រីខ ទឹកក្រូច និងបច្ច័យមួយចំនួនទៅចូលបុណ្យសពទៀតផង ។
សូមបញ្ជាក់ថា សពរបស់អតីតតារាចម្រៀង ខេមរៈ ស្រីពៅ ត្រូវបានដឹកតាមយន្តហោះពីប្រទេសឥណ្ឌា មកដល់កម្ពុជាកាលពីប្រលប់ថ្ងៃទី ២៧ ខែមករា ម្សិលមិញនេះ ដោយមានការចូលរួមរំលែកទុក្ខពីសំណាក់ប្រជាពលរដ្ឋជាច្រើនណែនណាន់តាន់តាប់ ហើយសព ក៏បានយកទៅតម្កល់ធ្វើបុណ្យនៅគេហដ្ឋានរបស់លោក ខេមរៈ សិរីមន្ត នៅជិតវត្តសំរោងអណ្ដែត ទល់មុខសួនសុបិន្តចំការព្រីង ៕
សហការី KBN