រាជធានីភ្នំពេញ ៖ ជនមិនស្គាល់មុខបានដុតស្មៅនៅលើដីវាល បណ្ដាលឲ្យមានការឆាបឆេះយ៉ាងសន្ធោសន្ធៅ និងឆេះរាលដាលដល់ឃ្លាំងស្តុកអេតចាយមួយកន្លែងដែលនៅជាប់របងពន្ធនាគារព្រៃស ភ្ញាក់ផ្អើលដល់អ្នកភូមិផងដែរ ។
ហេតុការណ៍នោះបានកើតឡើងកាលពីវេលាម៉ោង១១ព្រឹក ថ្ងៃទី២៥ មករា២០១៩ នៅជិតពន្ធនាគារព្រៃស ស្ថិតនៅតាមផ្លូវលំ ក្នុងភូមិកំរៀងសង្កាត់ព្រៃស ខណ្ឌដង្កោ ។
ប្រជាពលរដ្ឋនៅក្បែរកន្លែងកើតហេតុ និយាយប្រាប់ថា អគ្គិភ័យនេះ សង្ស័យបណ្តាលមកពីមានជនមិនស្គាល់មុខលួចដុតស្មៅ ទើបឆេះរាលដាលដល់ឃ្លាំងស្តុបអេតចាយ ។
ទោះជាយ៉ាងណា ករណីអគ្គិភ័យខាងលើនេះ មិនបណ្តាលឲ្យមានមនុស្សរងរបួសនោះទេ ហើយសម្ភារៈអេតចាយដែលឆេះនោះ នៅមិនទាន់ដឹងថាមានទំហំនៃការខូចខាតប៉ុណ្ណានៅឡើយ ។
សូមបញ្ជាក់ថា រថយន្តពន្លត់អគ្គិភ័យចំនួន៣គ្រឿង ចេញមកអន្តរាគមន៍ ជួយបាញ់ពន្លត់ទាន់ពេលវេលា ៕