ពិតជាគួរឲ្យសង្វេគខ្លាំងណាស់! គិតមកត្រឹមពេលនេះ មានរយៈពេលប្រមាណជា២ឆ្នាំហើយ ដែលជំងឺមួយនេះជា«ឃាតកស្ងប់ស្ងាត់» បាននិងកំពុងបំផ្លាញជីវិត នារីម្នាក់ វ័យ២៩ឆ្នាំ រស់នៅទាំងវេទនា រីងរៃ ពិបាកក្រៃលែង ពុំអាចទទួលទានទឹកបានដូចមនុស្សទូទៅ ខ្វះឈាមផង និងគ្មានថវិកាសម្រាប់លាងឈាមផង រហូតដល់ក្រុមគ្រួសារលក់ទ្រព្យសម្បត្តិគ្មានសល់ អស់លទ្ធភាពទៅហើយ ។
ផេន ចិន្តា អាយុ២៩ឆ្នាំ នាងមានជំងឺខូចតម្រងនោម (ឬដែលគេស្គាល់ថា ជំងឺខូចក្រលៀន) ដោយមិនដឹងខ្លួន ប្រមាណជាពីរឆ្នាំមកហើយ ដោយមិនអាចប្រកបការងារ ឬរកស៊ីទទួលដូចមនុស្សទូទៅបាន ដោយហេតុថា កញ្ញាត្រូវលាងឈាមមួយអាទិត្យ២ដង ព្រោះគ្មានប្រាក់គ្រប់គ្រាន់ដើម្បីវះកាត់ប្តូរក្រលៀននោះទេ លើកលែងតែអ្នកដែលមានទ្រព្យសម្បត្តិច្រើនលើសលប់ ។
នៅក្នុងប្រទេសកម្ពុជា នៅពុំទាន់អាចវះកាត់ប្តូរតម្រងនោម ឬក្រលៀននៅឡើយទេ ។ ដូចនេះវិធីសាស្ត្រដែលគេអាចធ្វើបានគឺការលាងឈាម ។ មជ្ឈមណ្ឌលលាងឈាម ក៏នៅមានចំនួនតិចតួច ហើយអ្នកឯកទេសជំងឺតម្រងនោមនៅមានកម្រិតតិចតួច ។ ជាហេតុធ្វើអោយ ផេន ចិន្តា ត្រូវចំណាយបន្ថែមលើការធ្វើដំណើរ និងស្នាក់នៅ ពីខេត្តតាកែវ មកភ្នំពេញ ។ ហើយការលាងឈាមមួយដងត្រូវចំណាយ៥០ដុល្លារ ។
នាពេលថ្មីៗនេះ កញ្ញាអស់លទ្ធភាពប្រយុទ្ធប្រឆាំងនឹង«ឃាតកស្ងប់ស្ងាត់»បន្តទៀត តាមរយៈគណនីបណ្តាញសង្គមហ្វេសប៊ុករបស់កញ្ញាមានឈ្មោះ Phen Chenda បានអំពាវនាវដល់សប្បុរសជនតាមរយៈវីដេអូមួយ ទាំងក្រៀមក្រំ ថា «នាងខ្ញុំ ឈ្មោះ ផែន ចិន្តា ភេទស្រី អាយុ២៩ឆ្នាំ មានស្រុកកំណើតនៅ ភូមិសូទៃ ឃុំញ៉ែងញ៉ង ស្រុកត្រាំកក់ ខេត្តតាកែវ ។ សព្វថ្ងៃនាងខ្ញុំមានជំងឺខូចតម្រងនោមឣស់រយៈពេល២ឆ្នាំជាងមកហើយ ។ តែឥឡូវនាងខ្ញុំពុំមានលទ្ធភាពដូរក្រលៀន ឫព្យាបាលនៅពេទ្យបន្តឡើយ ព្រោះការចំណាយលើការព្យាបាលលើជំងឺនេះវាថ្លៃពេក (ប្រមាណជាង៥០០ដុល្លារទៅ៦០០ដុល្លារក្នុងមួយខែ) ហើយគ្រួសារក៏អស់លទ្ធភាពហើយ ព្រោះម្តាយនាងខ្ញុំជាជនពិការភ្នែក រយៈ១០ឆ្នាំ ។ ការព្យាបាលនៃជំងឺនេះនាងខ្ញុំត្រូវធ្វើការលាងឈាម(២ដងក្នុងមួយសប្តាហ៌) ហើយមួយដងត្រូវចំណាយ៥០ដុល្លារ មិនគិតបញ្ជូលលើថ្លៃថ្នាំពេទ្យ និងការពិនិត្យផ្សេងៗឡើយ ។ ដោយហេតុដូចនេះ សូមបងប្ឣូនក្នុងប្រទេស និងក្រៅប្រទេស មេត្តាបន្តជួយដល់រូបនាងខ្ញុំ ដោយក្តីអនុគ្រោះផង ។ ជំនួយបងប្ឣូនទាំងឣស់គ្នា គឺជាការផ្តល់ជីវិតរស់នៅបន្តដល់រូបនាងខ្ញុំ ។ ជាចុងក្រោយ បើបងប្ឣូនពូមីង ចង់ផ្តល់ជំនួយ ដល់រូបនាងខ្ញុំ សូមទាក់ទងមកកាន់លេខនាងខ្ញុំផ្ទាល់ គឺលេខទូរស័ព្ទលេខ 070 595939 » ។
សូមបញ្ជាក់ថា កន្លងមកក៏មានសប្បុរសជនបានជួយជាបន្តបន្ទាប់ដែរ ប៉ុន្តែដោយសារជំនួយមិនគ្រប់តាមតម្រូវការនៃការចំណាយខ្ពស់នោះ និងជីវភាពខ្វះខាតទៀត ទើប ផែន ចិន្តា អំពាវនាវសប្បុរសជន ឲ្យបន្តជួយតាមសទ្ធាផងចុះ ៕
