រាជធានីភ្នំពេញ ៖ ក្រសួងពាណិជ្ជកម្ម បានចេញសេចក្តីថ្លែងការណ៍ទាំងយប់ នៅថ្ងៃទី១៧ ខែមករា ឆ្នាំ២០១៩នេះ ដើម្បីឆ្លើយតបនឹងសហភាពអឺរ៉ុប ដែលសម្រេចយកពន្ធលើអង្ករដែលនាំចូលពីកម្ពុជា ។
ក្រសួងពាណិជ្ជកម្មនៃកម្ពុជា បានសម្តែងការសោកស្តាយជាខ្លាំងចំពោះវិធានការរបស់សហភាពអឺរ៉ុប (EU) ដែលបានសម្រេចយកពន្ធលើអង្ករខ្មែរ ។ ក្រសួងបានចាត់ទុកវិធានការនេះថា ជាអាវុធសម្លាប់កសិករខ្មែរ និងបានប្រកាសតវ៉ាជាមួយសេចក្តីសម្រេចនេះ ទៅតាមទិដ្ឋច្បាប់ និងវិធានពាណិជ្ជកម្មអន្តរជាតិ ។
ក្រសួង បានសរសេរយ៉ាងដូច្នេះថា «ការសម្រេចដាក់វិធានការការពារទីផ្សារដោយសហភាពអឺរ៉ុប មកលើអង្ករ ដែលមានប្រភពដើមមកពីកម្ពុជា មានឥទិ្ធពលគ្រប់គ្រាន់ សម្រាប់ដកហូតចំណូលរបស់ប្រជាកសិករក្រីក្រកម្ពុជា និងជាអាវុធធ្វើឃាតពួកគាត់ និងក្រុមគ្រួសារ ដែលកំពុងជាប់បំណុល ជាមួយនឹងស្ថាប័នឥណទាន ដែលបានផ្តល់ប្រាក់កម្ចីដល់ពួកគាត់» ។
សេចក្តីថ្លែងការណ៍ បានបញ្ជាក់ទៀតថា «ក្រសួងពាណិជ្ជកម្មកម្ពុជា កំពុងពិនិត្យផ្ទៀងផ្ទាត់សេចក្តីសម្រេចនេះ ដោយផ្អែកលើទិដ្ឋភាពច្បាប់ និងវិធានការពាណិជ្ជកម្មអន្តរជាតិ ដើម្បីបន្តតវ៉ានឹងសេចក្តីសម្រេច ដែលប្រជាជនកម្ពុជាយល់ថា ជាសេចក្តីសម្រេចដែលគ្មានសុក្រឹតភាព និងសច្ចភាពសង្គម និងសេដ្ឋកិច្ច» ។
សូមបញ្ជាក់ថា សហគមន៍អឺរ៉ុប បានសម្រេចចាប់ផ្តើមយកពន្ធលើការនាំចូលអង្កររបស់កម្ពុជា និងប្រទេសមីយ៉ាន់ម៉ា ដែលនាំចេញទៅកាន់ប្រទេសដែលជាសមាជិកអឺរ៉ុបចំនួន២៨ប្រទេស សម្រាប់រយៈពេល៣ឆ្នាំ ចាប់ពីថ្ងៃទី១៨ ខែមករា ឆ្នាំ២០១៩នេះ រហូតដល់ឆ្នាំ២០២១ ។
ការយកពន្ធនាំចូលអង្កររបស់កម្ពុជា នៅឆ្នាំដំបូង តម្លៃពន្ធចំនួន១៧៥អឺរ៉ូ (ប្រហែល២០០ដុល្លារ) ក្នុង១តោន, ឆ្នាំទី២ តម្លៃ១៥០អឺរ៉ូ (ប្រហែល១៧០ដុល្លារ) ក្នុង១តោន និងឆ្នាំទី៣ តម្លៃ១២៥អឺរ៉ូ (ប្រហែល១៤២ដុល្លារ) ក្នុង១តោន ។ការយកពន្ធនេះ គឺអនុវត្តសម្រាប់អង្ករនាំចេញពីកម្ពុជា និងប្រទេសមីយ៉ាន់ម៉ា។
ការសម្រេចយកពន្ធលើអង្ករកម្ពុជានេះ ដោយសារអឺរ៉ុបបានបើកការស៊ើបអង្កេតជុំវិញសំណុំរឿងអង្ករនេះ ក្រោយពីមានបណ្ដឹងរបស់ប្រទេសអ៊ីតាលី និងអេស្ប៉ាញ ដោយមានការគាំទ្រពីប្រទេសមួយចំនួន ដែលបានចោទថា អង្ករកម្ពុជា និងមីយ៉ាន់ម៉ា ដែលនាំចូលសហភាពអឺរ៉ុប បានធ្វើឲ្យប៉ះពាល់អ្នកផលិតនៅប្រទេសទាំងនោះ។
សូមជម្រាបផងដែរថា សហគមន៍អឺរ៉ុប គឺជាទីផ្សារដ៏សំខាន់សម្រាប់អង្ករកម្ពុជា ។ នៅឆ្នាំ២០១៨ កម្ពុជានាំចេញអង្ករទៅអឺរ៉ុបជិត៣០ម៉ឺនតោន ស្មើនឹង៤២.៩៨ភាគរយនៃចំនួន ដែលបាននាំចេញទាំងអស់ចំនួន៦២ម៉ឺនតោន ៕