ភ្នំពេញ៖ បុរសម្នាក់ដែលគេស្គាល់ថាជាតារាសម្តែង ហើយត្រូវជាមិត្តប្រុសរបស់តារាចម្រៀងអ្នកនាង ពេជ្រ សោភា ត្រូវបានជនសង្ស័យធ្វើសកម្មភាពឆក់ទូរស័ព្ទដៃយកទៅបានសម្រេច ខណៈពេលដែលកំពុងជិះម៉ូតូកង់បីមកពីហូបពោតស្ងោរ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៨ ខែមករា ឆ្នាំ២០១៨ត្រង់ចំណុចខាងកើតស្តុបពេទផន តាមបណ្ដោយផ្លូវ១៨២ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក។
បុរសរងគ្រោះដោយសារជនសង្ស័យឆក់ទូរស័ព្ទដៃមានឈ្មោះ ឈឹម កក្តដា អាយុ ២៨ឆ្នាំ ជាតារាសម្ដែង និងតារាម៉ូដែល ស្នាក់នៅក្នុងសង្កាត់បឹងសាឡាង ខណ្ឌទួលគោក។
តាមសម្តីតារាសម្ដែងខាងលើបានរៀបរាប់ប្រាប់ឲ្យដឹងថា នៅមុនពេលកើតហេតុគាត់បានហៅម៉ូតូកង់បីឥណ្ឌាមួយគ្រឿងជិះចេញពីផ្ទះនៅម្តុំបឹងសាឡាងតែម្នាក់ឯង គោលបំណងទៅហូបពោតស្ងោនៅម្តុំវិមានឯករាជ្យ។
ពេលហូបរួចហើយគាត់ក៏បានជិះត្រលប់មកផ្ទះវិញ ដោយបានធ្វើដំណើរតាមបណ្ដោយផ្លូវ១៨៧ ក្នុងទិសដៅពីកើតទៅលិច មកដល់ចំណុចកើតហេតុ គាត់ក៏បានដកទូរស័ព្ទដៃមួយគ្រឿងម៉ាក oppo R17 Pro របស់គាត់យកមកលេងហ្វេសបុក ក៏ស្រាប់តែលេចមុខជនសង្ស័យពីរនាក់ជិះម៉ូតូមួយគ្រឿងម៉ាក ហុងដាឌ្រីម មិនចាំស្លាកលេខ មកពីក្រោយ។ រួចក៏បានធ្វើសមក្មភាពឆក់ទូរស័ព្ទដៃពីរូបគាត់ បណ្ដោយឲ្យទូរស័ព្ទជ្រុះទៅលើដី ភ្លាមៗនោះក៏មានបក្ខពួករបស់ជនសង្ស័យជិះម៉ូតូមួយគ្រឿងផ្សេងទៀត មករើសយកទូរស័ព្ទដៃរបស់គាត់រួចជិះរត់គេចខ្លួនបាត់ស្រមោល។
តារាសម្ដែងជាជនរងគ្រោះរូបនោះ បានបញ្ជាក់ទៀតថា គាត់មិនសូវស្តាយទូរស័ព្ទដៃដែលត្រូវក្រុមចោរធ្វើសកម្មភាពឆក់យកទៅនោះទេ គឺគាត់ស្តាយឯកសារសំខាន់ៗ ដែលគាត់បានរក្សាទុកក្នុងទូរស័ព្ទដៃនោះ គឺមានដូចជា មេឡូឌីចម្រៀង និងបារ៉ូលរឿងខ្លីៗ ដែលគាត់បាននិពន្ធជាច្រើន ជាឯកសារដែលគាត់គ្រោងចូលទៅក្នុងផលិតកម្មមួយ ក្នុងពេលឆាប់ៗខាងមុខនេះផងដែរ ។
ក្រោយពេលកើតហេតុ តារាសម្ដែងខាងលើត្រូវបានសមត្ថកិច្ចមូលដ្ឋានដឹកយកទៅសួរនាំនិងដាក់ពាក្យបណ្ដឹង នៅប៉ុស្តិ៍នរគបាលរដ្ឋបាលផ្សារដេប៉ូទី១ ដើម្បីសមត្ថកិច្ចស្រាវជ្រាវរកជនសង្ស័យយកមក ផ្តន្ទាទោសទៅតាមផ្លូវច្បាប់៕
