ភ្នំពេញ ៖ ប្ដីនិងប្រពន្ធដែលពាក់ព័ន្ធករណីស៊ីដាច់ប្រាក់ប្រជាពលរដ្ឋ ប្រមាណ១លានដុល្លារអាមេរិក តាមរូបភាពលក់ដីខ្យល់ ត្រូវតុលាការសម្រចឃុំខ្លួនដាក់ពន្ធនាគារហើយ នៅរសៀលថ្ងៃទី១៧ មករា ២០១៩ នេះ ។
ប្ដីប្រពន្ធ២នាក់ខាងលើ ត្រូវបាននគរបាលព្រហ្មទណ្ឌ ក្រសួងមហាផ្ទៃ ចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ ខណៈបក្ខពួករត់គេចខ្លួន ។
ជនសង្ស័យជាប្រពន្ធ មានឈ្មោះ ជៀម ច័ន្ទបុរី អាយុ៥០ឆ្នាំ មានស្រុកកំណើតនៅភូមិគោកទ្រា ឃុំព្រៃផ្ដៅ ស្រុកព្រៃកប្បាស ខេត្តតាកែវ ។ បច្ចុប្បន្នរស់នៅផ្ទះលេខ៥៤៥៥ ផ្លូវសម្បត្តិមាស១ បុរីសម្បត្តិមាសភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។ ចំណែកជនសង្ស័យជាប្តី មានឈ្មោះ អ៊ូ សៀករ៉ាន់ អាយុ៤៨ឆ្នាំ បានត្រូវលោក ហោ លីណា ព្រះរាជអាជ្ញារងអមសាលាដំបូងរាជធានីភ្នំពេញ ចោទប្រកាន់ពីបទឆបោក បទក្លែងឯកសារសាធារណៈ និងបទប្រើឯកសារក្លែង ។
ប្រភពព័ត៌មានពីសមត្ថកិច្ច បានឱ្យដឹងថា រូបភាពឆបោកនៃបុគ្គលទាំង២នាក់ដោយមុនដំបូងឡើយ ពួកគេបានចាត់តាំងគ្នីគ្នាឲ្យមានអ្នកដើរតួនៅខាងក្រៅប្រទេសជាមួយមេធាវី ទៅចុះកិច្ចសន្យាជាមួយធនាគារ ដើម្បីឲ្យអ្នកទិញបង់ប្រាក់ ដើម្បីលក់ដីខ្យល់ឲ្យប្រជាពលរដ្ឋ ដោយសង្ស័យទាំង២នាក់ប្តីប្រពន្ធ អះអាងថា ពួកគេមានដីរាប់រយហិតានៅខេត្តមួយ ការពិតគ្មានដីសូម្បីមួយចំអាមផង បែរជាជនសង្ស័យដើរឃោសនាអូសទាញឲ្យជឿស៊ប់ព្រមទិញ និងបង់ប្រាក់ជូនពួកគេ ។
ក្នុងនោះមានប្រជាពលរដ្ឋចំនួន១២គ្រួសារ បានចាញ់កលល្បិចនេះ ដោយបានបង់លុយទិញដីជាបន្តបន្ទាប់ មានគ្រួសារខ្លះអស់៥ម៉ឺនដុល្លារ ខ្លះអស់៨ម៉ឺនដុល្លារ និងខ្លះទៀតរហូតដល់៣៥ម៉ឺនដុល្លារ សរុបប្រមាណ១លានដុល្លារអាមេរិកឯណោះ ។ ប៉ុន្តែមិនឃើញមានដីអ្វីទេ ក្រៅតែពីក្រដាស់ប៉ុន្មានសន្លឹកបង្ហាញពីដីអភិវឌ្ឍន៏ នៅកន្លែងនេះ នៅកន្លែងនោះ ដោយមិនមានអ្វីច្បាស់លាស់សោះ ។
ដោយកើតការសង្ស័យ ប្រជាពលរដ្ឋរងគ្រោះ ក៏បានមកដាក់ពាក្យប្ដឹងដល់សមត្ថកិច្ចតែម្ដង ។ ទើបប៉ូលិសបានចាប់ខ្លួនជនសង្ស័យទាំង២នាក់ កាលពីថ្ងៃទី១៥ ខែមករា ឆ្នាំ២០១៩ នាំខ្លួនមកក្រសួងមហាផ្ទៃ ដើម្បីសាកសួររួចកសាងសំណុំរឿងបញ្ជូនមកអយ្យការអមសាលាដំបូង ដើម្បីបន្តនីតិវិធី ៕
