ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសារាចរណែនាំ ស្តីពី ការចាត់វិធានការថែរក្សាទឹកទុក ក្នុងរដូវប្រាំងឆ្នាំ២០១៩ ខាងមុខនេះ ។
តាមរយៈសារាចរនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ចេញនូវវិធានការសំខាន់ៗចំនួន៣ ដើម្បីទប់ទល់ជាមួយបញ្ហានេះ ។ វិធានការទាំង៣នោះរួមមាន ៖
១. ការងារបង្កបង្កើនផលស្រូវប្រាំងក្នុងឆ្នាំ២០១៩នេះ គឺអាចធ្វើបានតែ១ដងប៉ុណ្ណោះ ដោយមិនអាចធ្វើស្រូវប្រាំងលើកទី២បានទេ បើទោះបីជាទឹកនៅតាមបណ្តាអាងដែលបានរក្សាទុក និងកន្លែងមួយចំនួន ដែលមានទឹកជាធម្មជាតិក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀត ក្រៅពីស្រូវ ។
២. ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ត្រូវចូលរួមចាត់វិធានការថែរក្សាទឹកទុកឲ្យបានល្អ ដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះ រហូតដល់ពេលមានភ្លៀងធ្លាក់ជាធម្មតាឡើងវិញ ។
៣. ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ត្រូវត្រៀមលក្ខណៈជួយសង្គ្រោះប្រជាពលរដ្ឋដោយគ្រោះធម្មជាតិនានា ដូចជាខ្យល់កន្ត្រាក់ជាដើម ។
សារាចរណែនាំ ស្តីពីការចាត់វិធានការថែរក្សាទឹកទុក ធ្វើឡើងឆ្លើយតបតាមយៈលិខិតរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម គោរពជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី១៤ ខែមករា ឆ្នាំ២០១៩ ដើម្បីពិនិត្យ និងសម្រេចលើបញ្ហាអាកាសធាតុ ក្នុងរដូវប្រាំង ឆ្នាំ២០១៩ នេះ ។
ក្រសួងធនធានទឹកបានចេញសេចក្ដីប្រកាសអាសន្នអំពីការប្រែប្រួលអាកាសធាតុនៅក្នុងប្រទេសកម្ពុជា ។ តាមការព្យាករណ៍របស់ក្រសួងឲ្យដឹងថា រដូវប្រាំងនៅក្នុងឆ្នាំនេះ (ខែមេសា និងខែឧសភា) មានសភាពក្ដៅហួតហែងខ្លាំង សីតុណ្ហភាពអប្បបរមាហក់ដល់ ៤០-៤២អង្សា មានបាតុភូតផ្គរ រន្ទះ និងខ្យល់កន្ត្រាក់កើតឡើងច្រើន រដូវវស្សាមកដល់យឺតជាងបណ្ដាឆ្នាំកន្លងទៅ ។ ពិសេសនោះក្រសួងបានក៏បានឲ្យដឹងដែរថា ប្រជាជនអាចនឹងខ្វះទឹកប្រើ ដោយសារមានភ្លៀងធ្លាក់តិចតួចបំផុត ហើយក៏កំពុងចាត់វិធានការ និងសហការជាមួយដៃគូពាក់ព័ន្ធទាំងអស់ ធ្វើការស្តុកទឹកទុកផងដែរ ។
ដើម្បីកាន់តែច្បាស់សូមប្រជាពលរដ្ឋមកមើលសេចក្ដីជូនដំណឹងដូចខាងក្រោមនេះ ៖
