ប៉ារីស ប្រទេសបារាំង៖ យោងតាមការចេញផ្សាយរបស់ព័ត៌មាន BBC កាលពីល្ងាចថ្ងៃទីសៅរ៍ទី១២ ខែមករា ឆ្នាំ២០១៩មុននេះបន្តិច បានឲ្យដឹងថា មានករណីផ្ទុះហ្គាសយ៉ាងកក្រើកមួយ នៅតំបន់ពាណិជ្ជកម្មកណ្តាលទីក្រុងប៉ារីស នៃប្រទេសបារាំងនាព្រឹកថ្ងៃសៅរ៍នេះតែម្តង (ម៉ោងនៅប៉ារីស) បានបណ្តាលឲ្យមនុស្សមួយចំនួនទទួលរងរងរបួសធ្ងន់ និងស្រាល ខណៈពុំទាន់មានការបញ្ជាក់ អំពីចំនួនជងរងគ្រោះច្បាស់លាស់នោះឡើយ។
ខណៈដែលកំពុងមានភ្លើងឆេះយ៉ាងសន្ធោសន្ធៅនោះ ក្រុមសង្គ្រោះ និងពន្លត់អគ្គីភ័យ បានសស្រាក់សស្រាំក្នុងការជួយសង្គ្រោះមនុស្ស និងពន្លត់ភ្លើងឆេះ ក៏ប៉ុន្តែបើតាមការឲ្យដឹងជំហានដំបូងបានបង្ហាញថា ទ្រព្យសម្បត្តិសាធារណៈជាច្រើន ដូចជាអគារ រថយន្ត និងអ្វីៗជាច្រើនទៀតបានរងការខូចខាតយ៉ាងដំណំ ដោយសារតែករណីផ្ទុះហ្គាសយ៉ាងកក្រើកនេះ។
ក្រោយពីមានការស៊ើបសួរ និងមើលតាមកាម៉េរាសុវត្ថិភាពរួចមក ប៉ូលិសបានសន្និដ្ឋានថា ការផ្ទុះនេះទំនងជាបានកើតចេញពីហាងលក់នំប៉័ងមួយកន្លែង នៅតំបន់ Rue de Trévise នាវេលាម៉ោង ៩៖០០នាទីព្រឹក (ម៉ោងនៅប៉ារីស)។ ប៉ូលិសបានអំពាវនាវឲ្យប្រជាជនស្ថិតនៅឲ្យឆ្ងាយពីតំបន់នេះសិន ខណៈសកម្មភាពសង្គ្រោះ និងគ្រប់គ្រងស្ថានការណ៍ជារួមកំពុងបន្ត។ ការផ្ទុះនេះត្រូវបានគេអះអាងថា ពុំមានជាប់ពាក់ព័ន្ធនឹងគំរោងធ្វើមហាបាតុកម្ម នៃក្រុមអាវកាក់ពណ៌លឿងនោះឡើយ៕
